ඉන්දියාව සහ චීනය දේශසීමා ගැටලුවට දේශපාලන විසඳුමක් සෙවීම තවදුරටත් ඉදිරියට ගෙන යාමට එකඟ වෙති
1 min read
ඉන්දියාව සහ චීනය අතර දේශසීමා ආරවුලට දේශපාලන විසඳුමක් සෙවීම සඳහා තවදුරටත් කටයුතු කිරීමට දෙරට එකඟ වී ඇතැයි වාර්තාවේ. මේ බව අඟහරුවාදා(25) බීජිංහිදී පැවැති ඉහළ පෙළේ නිලධාරීන්ගේ සාකච්ඡාවලදී ප්රකාශ වී ඇති බව ජාත්යන්තර මාධ්ය වාර්තා කරයි.
දේශසීමා සාකච්ඡා යාන්ත්රණයේ විශේෂ නියෝජිතයන් වන ඉන්දීය ජාතික ආරක්ෂක උපදේශක අජිත් දොවාල් සහ චීන විදේශ අමාත්ය වැන්ග් යී අතර “ඉන්දියා–චීන දේශසීමා ප්රශ්නය සම්බන්ධයෙන් අවංක සහ ගැඹුරු අදහස් හුවමාරුවක් සිදු වූ අතර, දෙරටේ සමස්ත හා දිගුකාලීන අවශ්යතා සැලකිල්ලට ගනිමින් දේශසීමා ප්රශ්නයට දේශපාලන විසඳුමක් සෙවීම සඳහා තවදුරටත් කටයුතු කිරීමට එකඟ වූ” බව ඉන්දීය විදේශ කටයුතු අමාත්යාංශය නිවේදනයක් නිකුත් කරමින් සඳහන් කළේය.
කයිලාෂ් මානසසරෝවර් වන්දනා ගමන සහ හිමාලයානු කඳු මාර්ග හරහා දේශසීමා වෙළඳාම යළි ආරම්භ කිරීම ඇතුළුව, දෙරට අතර ජනතාව අතර සබඳතා සහ දේශසීමා හරහා සිදුවන හුවමාරු ක්රමයෙන් යළි යථා තත්ත්වයට පත්වීම පිළිබඳව දෙපාර්ශ්වයම සෑහීමකට පත්වන බව ද ප්රකාශ කර තිබෙන බවද වාර්තා වේ.
2024 ඔක්තෝබර් මාසයේ රුසියාවේ කසාන් නගරයේ පැවැති BRICS සමුළුවට සමගාමීව ඉන්දීය අගමැති නරේන්ද්ර මෝදි සහ චීන ජනාධිපති ෂී ජින්පිං අතර ඇති කරගත් එකඟතාව ක්රියාත්මක කිරීමේදී සිදුව ඇති ප්රගතිය පිළිබඳව විශේෂ නියෝජිතයන් අවධානය යොමු කළහ. 2025 අගෝස්තු මාසයේ චීනයේ ටියැන්ජින් නගරයේ පැවැති ෂැංහයි සහයෝගිතා සංවිධානයේ (SCO) සමුළුවට සමගාමීව දෙරටේ නායකයන් යළි ඇති කරගත් එකඟතාව පිළිබඳව ද ඔවුහු සාකච්ඡා කර ඇතැයිද වාර්තාවේ.
2020 වසරේ හිමාලයානු ලඩාක් කලාපයේ ඇති වූ ගැටුමකින් ඉන්දීය සෙබළුන් 20 දෙනකු සහ අවම වශයෙන් චීන සෙබළුන් සිව් දෙනකු මිය යාමෙන් පසු, කසාන්හිදී මෝදි සහ ෂී අතර පැවැති හමුව වසර හතරකට පසු දෙරටේ නායකයන් අතර පැවැති පළමු විධිමත් ද්විපාර්ශ්වික සාකච්ඡාව විය.
කසාන්හිදී මෝදි සහ ෂී එකඟ වූයේ දේශසීමා ප්රශ්නයට විසඳුම් සෙවීම සඳහා විශේෂ නියෝජිත යාන්ත්රණය සහ විදේශ අමාත්ය මට්ටමේ සාකච්ඡා භාවිතා කිරීමටත්, දේශසීමා ප්රදේශවල සාමය පවත්වා ගැනීමටත්ය.
බීජිංහි පැවැති සාකච්ඡා මෝදි සහ ෂීගේ උපායමාර්ගික මඟපෙන්වීම යටතේ, නිර්මාණාත්මක සහ අනාගතය දෙස බලා කටයුතු කරන ආකාරයකින් පැවැති බව ඉන්දීය විදේශ අමාත්යාංශය සඳහන් කළේය. ද්විපාර්ශ්වික සබඳතා අඛණ්ඩව වර්ධනය කිරීම හා ප්රගතිය සඳහා දේශසීමා ප්රදේශවල සාමය සහ ස්ථාවරත්වය පවත්වා ගැනීමේ වැදගත්කම ඉන්දියාව අවධාරණය කළ බව ද අමාත්යාංශය නිවේදනයක් නිකුත් කළ නිවේදනයේ සඳහන් වේ.
මෙවර කිර්ගිස්තානයේ බිෂ්කෙක් නගරයේදී ලබන සතියේ පැවැත්වීමට නියමිත SCO සමුළුව සහ ලබන මාසයේ නවදිල්ලියේ පැවැත්වීමට නියමිත BRICS සමුළුව සඳහා දෙරට සූදානම් වෙමින් සිටින අතර, දොවාල් සහ වැන්ග් දෙරටට අන්යෝන්ය වශයෙන් වැදගත් ද්විපාර්ශ්වික, කලාපීය සහ ජාත්යන්තර කරුණු පිළිබඳව ද සාකච්ඡා කළහ.
වාර්තා අනුව, චීන ජනාධිපති ෂී ජින්පිං විශාල නියෝජිත පිරිසක් සමඟ BRICS සමුළුවට සහභාගී වීමට නියමිතය. විශේෂ නියෝජිත මට්ටමේ සාකච්ඡා ආරම්භ කිරීමට පෙර දොවාල් චීන උප ජනාධිපති හැන් ෂෙං ද හමුවිය.
