ඉදිරි මාසවල ශ්රී ලංකාවේ ආහාර අනාරක්ෂිතතාව උග්ර වෙනවා.. මානුෂීය අධාර අවශ්යයි..- Fews Net කියයි
1 min read
එළඹෙන වසරේ ජනවාරි දක්වා වූ කාලය තුළ ශ්රී ලංකාවේ ලක්ෂ 10ත් 15ත් අතර ජනගහනයකට පෝෂ්යදායී ආහාර වේලක් ලබා ගැනීම සඳහා මානුෂීය ආධාර අත්යවශ්ය වනු ඇති බව සාගත පිළිබඳ පූර්ව අනතුරු ඇඟවීමේ පද්ධති ජාලය (FEWS NET) වාර්තා කරයි.
ඇමෙරිකානු ආධාර මත ක්රියාත්මක වන මෙම සංවිධානය පෙන්වා දෙන්නේ විශේෂයෙන්ම එළඹෙන ඔක්තෝබර් සිට දෙසැම්බර් දක්වා කාලය තුළ මෙම ආහාර අනාරක්ෂිතතාව වඩාත් උග්ර විය හැකි බවයි.
ආර්ථික අර්බුදයෙන් පසු නාගරික ප්රදේශවල රැකියා අවස්ථා යම් මට්ටමකට වර්ධනය වී තිබුණද, ජනතාවගේ වැටුප් වර්ධනයට වඩා ආහාර මිල, ප්රවාහන ගාස්තු, විදුලි හා ජල ගාස්තු මෙන්ම ණය වාරික ගෙවීම් ඉහළ යාම මේ සඳහා ප්රධාන හේතුව වී තිබේ.
මේ නිසා අඩු ආදායම්ලාභී පවුල් බොහෝමයක් සිය දෛනික ආහාර වේල් ගණන අඩු කිරීමට හෝ ගන්නා ආහාර ප්රමාණය සීමා කිරීමට පෙළඹී ඇත.
මෙම අවදානමට වැඩි වශයෙන් තෙත් කලාපයේ අඩු ආදායම්ලාභී වතු කම්කරුවන්, බස්නාහිර, උතුරු සහ නැගෙනහිර වෙරළබඩ ධීවර ප්රජාව මෙන්ම නාගරික හා නාගරික ආසන්න පහළ ආදායම්ලාභී ජනතාව ගොදුරු වී සිටිති.
ප්රවාහන වියදම් සහ කෘෂිකාර්මික යෙදවුම් මිල ඉහළ යාම හේතුවෙන් වෙළෙඳපොළ ආහාර මිල ගණන් සැප්තැම්බර් මාසය දක්වාම ඉහළ මට්ටමක පැවතිය හැකි බවත්, හදිසි ආහාර සහනාධාර සැපයීමේ මහා පරිමාණ වැඩසටහනක් ක්රියාත්මක නොවීම මගින් මෙම තත්ත්වය තවදුරටත් සංකීර්ණ වන බවත් FEWS NET සංවිධානය වැඩිදුරටත් සඳහන් කරයි.
