සුරේෂ් සලේට සලකන විදිහ නීති විරෝධී නෑ.. – නලින්ද ජයතිස්ස
1 min read
රැඳවුම් නියෝග මත රඳවා සිටින රාජ්ය බුද්ධි සේවයේ හිටපු ප්රධානී සුරේෂ් සලේ මහතාට කිසිදු ආකාරයක වදහිංසාවක් පමුණුවා නොමැති බවත්, ඔහුට සැලකීමේදී කිසිදු අනීතික ක්රමවේදයක් අනුගමනය කර නොමැති බවත් රජයේ මාධ්ය ප්රකාශක, අමාත්ය නලින්ද ජයතිස්ස මහතා අද (09) අවධාරණය කළේය.
අද පැවති කැබිනට් තීරණ දැනුම්දීමේ මාධ්ය හමුවේදී අදහස් දක්වමින් අමාත්යවරයා කියා සිටියේ, රජය භාරයේ සිටින ඕනෑම පුද්ගලයෙකුට සාමාන්ය රැඳවුම් නියෝග යටතේ කටයුතු කරන ආකාරයටම සුරේෂ් සලේ මහතා සම්බන්ධයෙන් ද කටයුතු කර ඇති බවයි.
බුද්ධි නිලධාරියෙකු ලෙස මෙවැනි අවස්ථාවක රජයක් කටයුතු කරන්නේ කෙසේද යන්න පිළිබඳව ඔහුටම අවබෝධයක් තිබිය යුතු බව ද අමාත්යවරයා එහිදී සඳහන් කළේය.
සුරේෂ් සලේ මහතා අත්අඩංගුවේ සිටියදී ඔහුට අමානුෂික ලෙස සලකන බවට එල්ල වන චෝදනා රජයේ මාධ්ය ප්රකාශකවරයා ලෙස ප්රතික්ෂේප කරන්නේදැයි මාධ්යවේදීන් නැගූ ප්රශ්නයකට පිළිතුරු දෙමින් අමාත්යවරයා කියා සිටියේ එම ප්රකාශ අනිවාර්යයෙන්ම ප්රතික්ෂේප කරන බවයි.
සලේ මහතාට රැඳවුම් මධ්යස්ථානයේදී නිසි ලෙස ආහාර පාන ලබා දෙන බවත්, එසේ නොවුණහොත් ඔහුට මේ ආකාරයෙන් සිටීමට නොහැකි වනු ඇති බවත් අමාත්යවරයා පවසා සිටියේය.
වැඩිදුරටත් අදහස් දැක්වූ අමාත්යවරයා කියා සිටියේ, මේ සම්බන්ධයෙන් යම් ගැටලුවක් පවතින්නේ නම් පසුගිය කාලසීමාවේ රැඳවුම් නියෝග යටතේ රඳවා සිටි පුද්ගලයන්ගෙන් ඔවුන්ට කටයුතු කළ ආකාරය පිළිබඳව විමසා බැලිය හැකි බවයි.
