වායු දූෂණයෙන් ලංකාවේ 7000ක් සෑම වසරකම මරුට
1 min read
පරිසර දූෂණය (වායු දූෂණය) හේතුවෙන් ඇතිවන රෝගවලින් සෑම වසරකම ශ්රී ලංකාවේ පුද්ගලයන් 7000 ක් පමණ අකාලයේ මියැදෙන බව සෞඛ්ය අමාත්යාංශයේ පාරිසරික හා වෘත්තීය සෞඛ්ය ඒකකයේ අධ්යක්ෂ වෛද්ය චාන්දනී විතාන කියයි.
වායු දූෂණය හේතුවෙන් ශ්වසන ක්රියාවලියේදී මිනිසුන් ශ්වසන රෝග, ඇදුම, හතිය ආදී රෝගවලට ගොදුරු වන බවත් ඊට අමතරව පෙණහලු රෝග, පෙණහලු පිළිකා, අංශභාග ආදී රෝගවලට ගොදුරු වන බවද වෛද්යවරිය සඳහන් කරයි.
වාතයේ තිබෙන කාබන් ඩයොක්සයිඩ්, කාබන් මොනොක්සයිඩ්, නයිට්රස් ඩයොක්සයිඩ්, සල්ෆර් ඩයොක්සයිඩ් වැනි අහිතකර වායු මෙන්ම P.M. 2.5 ට අඩු සියුම් අංශු ආදිය ශ්වසන ක්රියාවලියේදී පෙණහලු තුළට කිඳා බැස රුධිරයට මිශ්රවන බවද ඇය පෙන්වා දෙයි.
වැඩිම වශයෙන් පරිසර දූෂණය (වායු දූෂණය) සිදුවන්නේ වාහනවලින් බවත් මීට අමතරව කර්මාන්ත ශාලාවලින් ගිනි තැබීම් සහ දරවලින් ඉවුම් පිහුම් කිරීම් ආදියෙන්ද වායු දූෂණය සිදුවන බවත් ශ්වසනය මගින් ශරීරගත වී විවිධ රෝගාබාධවලට ගොදුරු වන බවද වෛද්ය චාන්දනී විතාන කීය.
මේ තත්ත්වය හේතුවෙන් වායු දූෂණය අවම කරගැනීම සඳහා සියලු දෙනා වගකීමෙන් කටයුතු කළ යුතු බවත් අපද්රව්ය පරිසරයට මුදා හැරීමේදී අදාළ උපදෙස් අනුගමනය කළ යුතු බවත් සෞඛ්ය ප්රවර්ධන කාර්යාශයේ ඊයේ (5දා) පැවැති මාධ්ය හමුවකදී ඇය සඳහන් කළාය. සෞඛ්ය අමාත්යාංශයේ පාරිසරික හා වෘත්තීය සෞඛ්ය ඒකකයේ ප්රජා වෛද්ය විශේෂඥ ඉනෝකා සමරවීරද මෙහිදී අදහස් පළ කළාය.
