මහවැලි ගඟ පිටාර ගලයි…! මහා ගංවතුර අවධානමක්…! විමසිල්ලෙන් සිටින්න….
1 min read
මහවැලි ගඟේ ඉහළ ධාරා ප්රදේශවලට ඇද හැලෙන අධික වර්ෂාව හේතුවෙන් ඉදිරි පැය 48 තුළ මහා ගංවතුර තත්ත්වයක් ඇතිවීමේ දැඩි අවදානමක් පවතින බව වාරිමාර්ග දෙපාර්තමේන්තුව නිවේදනය කරයි.
මේ හේතුවෙන් මහවැලි ගඟ ආශ්රිත පහත්බිම්වල වෙසෙන ජනතාවට වහාම ක්රියාත්මක වන පරිදි ‘රතු’ (අංක 01) මට්ටමේ ගංවතුර අනතුරු ඇඟවීමේ නිවේදනයක් නිකුත් කර තිබේ.
වාරිමාර්ග අධ්යක්ෂ ජනරාල් ඉංජිනේරු කිත්සිරි වැලිගෙපොලගේ මහතාගේ අත්සනින් යුතුව අද (03) පස්වරු 1.00ට නිකුත් කරන ලද මෙම නිවේදනය එළඹෙන අගෝස්තු 05 වනදා පස්වරු 1.00 දක්වා බලපැවැත්වේ.
පසුගිය පැය කිහිපය තුළ මහවැලි ගඟේ ඉහළ පෝෂක ප්රදේශවලට ලැබුණු අධික වර්ෂාපතනය සහ ඉදිරියේදී තවදුරටත් වැසි ලැබෙනු ඇතැයි යන කාලගුණ අනාවැකි මත පදනම්ව මෙම අනතුරු ඇඟවීම සිදු කර ඇත.
විශේෂයෙන්ම කොත්මලේ ජලාශයේ වාන් දොරටු විවෘත කිරීමට සිදුවීමේ අවදානමක් පවතින බැවින් ගඟේ ජල මට්ටම ශීඝ්රයෙන් ඉහළ යා හැකි බව වාරිමාර්ග දෙපාර්තමේන්තුව පෙන්වා දෙයි.
මෙම ගංවතුර අවදානම උඩුනුවර, උඩපළාත, යටිනුවර, දොළුව, කොත්මලේ, පස්බාගේ, ගඟ ඉහළ කෝරළේ, පස්බාගේ කෝරළේ, ගඟවට කෝරළේ, හාරිස්පත්තුව සහ පාතදුම්බර යන ප්රාදේශීය ලේකම් කොට්ඨාසවලට අයත් මහවැලි ගඟ ආශ්රිත පහත්බිම් ප්රදේශවලට බලපානු ඇතැයි අපේක්ෂා කෙරේ.
එබැවින් එම ප්රදේශවල පදිංචි ජනතාව මේ පිළිබඳව දැඩි විමසිල්ලෙන් පසුවිය යුතු අතර, ඇතිවිය හැකි ගංවතුර තත්ත්වයකින් ආරක්ෂා වීමට අවශ්ය පූර්ව ආරක්ෂිත පියවර ගන්නා ලෙස ද උපදෙස් දී තිබේ.
මේ සම්බන්ධයෙන් අවශ්ය ක්රියාමාර්ග ගන්නා ලෙස ආපදා කළමනාකරණ අංශවලින් ද ඉල්ලා සිටින වාරිමාර්ග දෙපාර්තමේන්තුව, පවතින තත්ත්වය පිළිබඳව අතිශය අවධානයෙන් පසුවන ලෙස මහජනතාවගෙන් වැඩිදුරටත් ඉල්ලා සිටියි.
