විනිසුරු වයස ගැන තමාට කට වහගන්නැයි කියූ ප්රබලයා ගැන ලාල් විජේනායක හෙළිකරයි…
1 min read
ජ්යෙෂ්ඨ අධිකරණ විනිසුරුවරුන්ගේ විශ්රාම යෑමේ වයස දීර්ඝ කිරීමට ආණ්ඩුව ගෙන යන පියවර සම්බන්ධයෙන් නිශ්ශබ්දව සිටින ලෙස කෘෂිකර්ම අමාත්ය කේ. ඩී. ලාල්කාන්ත මහතා තමාගෙන් ඉල්ලා සිටි බව පාලක ජාතික ජන බලවේගයේ (NPP) නායකත්ව කවුන්සිලයේ, විධායක කමිටුවේ සහ ජාතික මෙහෙයුම් කමිටුවේ සාමාජිකයකු වන ජ්යෙෂ්ඨ නීතිඥ ලාල් විජේනායක මහතා ඊයේ පැවසීය.
වසර පනහකට වැඩි කාලයක් තිස්සේ අධිකරණයේ ස්වාධීනත්වය වෙනුවෙන් සටන් කළ අයෙකු ලෙස තමාට මේ පිළිබඳව නිහඬව සිටිය නොහැකි බව විජේනායක මහතා සඳහන් කළේය.
“දවසක් එක සාමාජිකයෙක් මට කෝල් කළා — එයා නායකත්ව කවුන්සිලයේ, දේශපාලන මණ්ඩලයේ වගේම අනෙකුත් කමිටුවලත් ඉන්න සාමාජිකයෙක්. එයා මගෙන් ඇහුවා ‘ඇයි ඔයාට මේ ගැන කතා නොකර නිහඬව ඉන්න බැරි?’ කියලා,” යැයි ඩේලි මිරර් පුවත්පත සමඟ පැවැති සම්මුඛ සාකච්ඡාවකදී ඔහු පැවසීය.
එලෙස කතා කළේ ලාල්කාන්ත මහතා බව හඳුනාගත් ඔහු, පසුව තමාගේ ස්ථාවරය පැහැදිලි කරමින් ඔහු වෙත ලිපියක් යැවූ බවත්, එහි පිටපත් ජනාධිපති අනුර කුමාර දිසානායක මහතාට සහ ජාතික ජන බලවේගයේ ලේකම් වෛද්ය නිහාල් අබේසිංහ මහතාට යැවූ බවත් පැවසීය.
විජේනායක මහතා පැවසුවේ තමාගේ මෙම විරෝධය ප්රතිපත්තිමය කරුණක් මත පදනම් වූවක් මිස ජාතික ජන බලවේගයේ නායකයින් සමඟ ඇති පෞද්ගලික අමනාපයක් නොවන බවයි.
“මේක ප්රතිපත්තිමය කාරණයක්. සිවිල් සමාජයක ජීවත් වීමට නම් නීතියේ ආධිපත්යය තියෙන්න ඕනේ. නීතියේ ආධිපත්යය පවතින්නේ අධිකරණයේ ස්වාධීනත්වය තිබුණොත් විතරයි,” යැයි ඔහු පැවසීය.
විනිසුරුවරුන්ගේ සේවා කොන්දේසිවලට බලපාන තීරණ මගින් අනාගත ආණ්ඩුවලට අධිකරණය තම වුවමනාවන්ට අනුව හසුරුවා ගැනීමට මග පාදන අතර, එමගින් අධිකරණයේ ස්වාධීනත්වය බිඳවැටීමට ලක්විය හැකි බව ඔහු වැඩිදුරටත් සඳහන් කළේය.
ලංකා සමසමාජ පක්ෂය සමඟ වසර 50 කට ආසන්න කාලයක් කටයුතු කර ඇති විජේනායක මහතා පැවසුවේ, ප්රධාන තීරණ ගැනීමට පෙර පුළුල් ලෙස සාකච්ඡා කරන ක්රමවේදයකට තමා හුරු වී සිටි බවයි.
“නමුත් ජාතික ජන බලවේගය තුළ මම ඒ වගේ ක්රියාවලියක් දකින්නේ නැහැ. තීරණ කොහේ හරි තැනකදී ගන්නවා වගේ පෙනුනත්, ඒ තීරණ ඇත්තටම ගන්නේ කොතැනද කියන එක පැහැදිලි නැහැ. ප්රශ්නය තියෙන්නේ එතැනයි,” යැයි ඔහු පැවසීය.
