මාලිමා ආණ්ඩුව අධිකරණය හමුවේ දණගසයි! සමලිංගික සංචාරක ව්යාපෘතිය හකුළාගනියි!
1 min read
අද දින අභියාචනාධිකරණය හමුවේ CA/Writ/1044/2025 නඩුව විභාගයට ගත් අවස්ථාවේ දී සංචාරක සංවර්ධන අධිකාරියේ සභාපති වෙනුවෙන් පෙනීසිටි නීතිපති දෙපාර්තමේන්තුව අධිකාරියේ අධ්යක්ෂක මණ්ඩල තීන්දුවක පිටපතක් ඉදිරිපත් කරමින් සඳහන් කළේ සමලිංගික සංචාරක කර්මාන්තය ප්රචලිත කිරීම සඳහා කිසිඳු ආකාරයකින් ක්රියා නොකරන බවය.
එසේ විභාගයට ගනු ලැබුවේ දේශහිතෛෂී ජාතික ව්යාපාරය, ජාතික සංවිධාන එකමුතුව, ගෝලීය ශ්රී ලාංකික සංසදය සහ දේශප්රේමී ජාතික පෙරමුණ ආදී වශයෙන් වන සංවිධාන කිහිපයක නායකයින් විසින් සංචාරක සංවර්ධන අධිකාරියේ සභාපතිවරයා විසින් සමලිංගික සංචාරක කර්මාන්තය ප්රචලිත කිරීම අනුමත කරමින් නිකුත් කරන ලද ලිපියකට අදාළව රිට් ආඥාවක් නිකුත් කරන ලෙස ඉදිරිපත් කරන ලද පෙත්සමකි.
ඒ අනුව අධිකරණය හමුවේ කරුණු දැක්වූ ජ්යෙෂ්ඨ නීතිඥ කනිෂ්ක විතාරණ මහතා සඳහන් කළේ අධ්යක්ෂ මණ්ඩල තීන්දුවක් අනුව සමලිංගික සංචාරක ව්යාපෘතිය ප්රචලිත නොකරන බවට පිළිගැනීම ප්රතිපත්තිමය තීන්දුවක් ලෙස පිළිගන්නා බවයි. එහිදී නඩුව තවදුරටත් විභාග කිරීමේ අවශ්යතාවක් නොමැති බව සහ අධිකරණයට ඉදිරිපත් කළ ප්රකාශිත ප්රතිපත්තියේ වෙනසක් සිදුවුව හොත් නැවත අධිකරණයට පැමිණිලි කිරීම සඳහා පත්සම්කරුවන්ට හැකියාව ඇති බව අධිකරණය විසින් ප්රකාශයට පත්කරනු ලැබීය.
ඒ පිළිබඳව අදහස් දැක්වූ ජ්යෙෂ්ඨ නීතිඥ කනිෂ්ක විතාරණ සමතා සඳහන් කළේ සංචාරක අධිකාරියේ ලියාපදිංචි ආයතන සමලිංගික සංචාරක ව්යාපාරය ප්රචලිත කරනවාද යන්න සොයා බලා ඉදිරි පියවර ගන්නා බවය. මේ වන විට යම් ආයතනයක් ශ්රී ලංකාව සමලිංගික ගමනාන්තයක් ලෙස ප්රචලිත කරමින් වෙබ් අඩවිවල දැන්වීම් පළ කර ඇතත් ඒවා අධිකාරියේ ලියාපදිංචි වී ඇත්ද යන්න පැහැදිලි නැත.
මෙම නඩුවේ පෙත්සම්කරුවන් වූයේ අචාර්ය ගුණදාස අමරසේකර, වෛද්ය වසන්ත බණ්ඩාර, නීතිඥ නුවන් බැල්ලන්තුඩාව සහ මනෝ උපදේශක ශ්යාමේන්ද්ර වික්රමාරච්චි යන මහත්වරුන්ය.
පුවත් එසැනින් බලන්න අපගේ WhatsApp සමූහය සමගින් එක් වන්න!
