ශ්‍රීලන්කන් ගුවන් සේවය දැවැන්ත මූල්‍ය පාඩුවක.. – මුල් කාර්තු අලාභය බිලියන 35 ඉක්මවයි..
1 min read
ගුවන් ඉන්ධන මිල ශීඝ්‍රයෙන් ඉහළ යාම සහ මැදපෙරදිග පවතින ගැටුම්කාරී වාතාවරණය හමුවේ ශ්‍රීලන්කන් ගුවන් සේවය දැඩි මූල්‍ය අර්බුදයකට මුහුණ දී සිටී.
මුදල් අමාත්‍යාංශයේ මධ්‍ය වාර්ෂික මූල්‍ය වාර්තාවට අනුව, 2026/27 මූල්‍ය වර්ෂයේ පළමු කාර්තුව තුළ පමණක් සමාගමේ බදු පෙර අලාභය රුපියල් බිලියන 35.6ක් වේ.
සමස්ත ආදායම රුපියල් බිලියන 82.8ක් දක්වා වර්ධනය වී තිබුණද, ඉහළ යන මෙහෙයුම් පිරිවැය, ඉන්ධන සහ නඩත්තු ගාස්තු මෙන්ම විදේශ විනිමය අලාභ හේතුවෙන් මෙම දැවැන්ත පරතරය නිර්මාණය වී තිබේ.
කෙසේ වෙතත්, අනුබද්ධිත ‘ශ්‍රීලන්කන් කේටරින්’ සමාගම රුපියල් බිලියන 3.4ක ශුද්ධ ලාභයක් ලැබීම හේතුවෙන් සමස්ත සමූහයේ ශුද්ධ අලාභය රුපියල් බිලියන 32.2ක් දක්වා මඳක් අවම කර ගැනීමට හැකි වී ඇත.
2026 ජූනි වන විට සමාගමේ සමස්ත වත්කම් ප්‍රමාණය රුපියල් බිලියන 209.9ක් වුවත්, සමස්ත වගකීම් ප්‍රමාණය බිලියන 561.4ක් දක්වා ඉහළ යාම නිසා ප්‍රාග්ධනය බරපතළ ලෙස ඛාදනය වී තිබේ.
මේ පිළිබඳව අදහස් දක්වන ශ්‍රීලන්කන් ගුවන් සේවයේ ප්‍රධාන විධායක නිලධාරී විපුල් මිස්රා මහතා පෙන්වා දෙන්නේ, ලෝක වෙළෙඳපොළේ බොරතෙල් මිල ඉහළ යාම නිසා ඛනිජ තෙල් පිරිපහදු සමාගම් පෙට්‍රල් සහ ඩීසල් නිෂ්පාදනයට වැඩි නැඹුරුවක් දැක්වීම හේතුවෙන් ගුවන් ඉන්ධන සැපයුම සීමා වී, මිල අධික ලෙස ඉහළ ගොස් ඇති බවයි.
රජය විසින් මෙතෙක් බැංකු ණය ගෙවීම් සඳහා විවිධ මැදිහත් වීම් සිදු කර ඇති අතර, කෙටිකාලීන මූල්‍ය අවශ්‍යතා වෙනුවෙන් ඇමරිකානු ඩොලර් මිලියන 30ක් මුදා හැරීමට සහ ඩොලර් මිලියන 126.5ක වටිනාකම රජයේ ණය තොගයට පවරා ගැනීමටද පියවර ගෙන ඇත.
