දැරියකට අතවර කළ බවට සැක රොබෝවෙක් ජර්මානු පොලිස් භාරයට..
1 min read
ජර්මනියේ කොලෝන් නගරයේදී 16 හැවිරිදි දැරියකට අතවරයක් සිදුකළ බවට සැක කෙරෙන රොබෝ යන්ත්‍රයක් පොලිසිය විසින් සිය භාරයට ගෙන ඇති බව බීබීසී පුවත් සේවය වාර්තා කරයි.
සිද්ධිය සම්බන්ධයෙන් එම රොබෝ යන්ත්‍රයේ හිමිකරු වන 16 හැවිරිදි තරුණයා සහ 19 හැවිරිදි තවත් පුද්ගලයෙකුට එරෙහිව පොලිසිය විමර්ශනයක් ආරම්භ කර ඇති බව සඳහන්.
පොලිසිය සඳහන් කර ඇත්තේ, රතු සහ රන්වන් පැහැයෙන් යුත් සෙන්ටිමීටර් 120ක් පමණ උස මෙම රොබෝ යන්ත්‍රය, මිතුරන් පිරිසක් සමග සිටි දැරියක් පිටුපසින් පැමිණ ඇගේ පිටුපස ප්‍රදේශය ස්පර්ශ කර ඇති බවට චෝදනා එල්ල වී ඇති බවයි.
එමෙන්ම රොබෝ යන්ත්‍රය දැරියගේ සිරුරට එරෙහිව ලිංගික අර්ථයක් ගම්‍ය වන ආකාරයේ චලනයන් සිදුකර ඇති බවත්, එහිදී දැරිය කෑගසා ඉන් ඉවත් වී ඇති බවත්, පොලිසිය සඳහන් කරන බවයි විදෙස් මාධ්‍ය පවසන්නේ.
අදාළ සිදුවීම සමාජ මාධ්‍ය ඔස්සේ සජීවීව විකාශය කරමින් සැකකරුවන් ඒ පිළිබඳ අදහස් දක්වා ඇති බවට ද පොලිසිය සැක පළ කරයි.
සිද්ධිය පිළිබඳ තොරතුරු ලැබීමෙන් පසු ක්‍රියාත්මක වූ හදිසි සේවා නිලධාරීන්, මඳ වේලාවකට පසු ඒ ආසන්නයේ සිටි සැකකරුවන් දෙදෙනා සොයාගෙන ඇති අතර, රොබෝ යන්ත්‍රය මෝටර් රථයක පිටුපස තිබියදී සොයාගෙන එය පොලිස් භාරයට ගෙන ඇති බව සඳහන්ය.
සැකකරුවන් සතු ජංගම දුරකථන දෙකක් ද පොලිසිය භාරයට ගෙන ඇති අතර, සිදුවීම සිදුවන අවස්ථාවේදී රොබෝ යන්ත්‍රයේ චලනයන් හිතාමතා පාලනය කළේද යන්න සම්බන්ධයෙන් විමර්ශන සිදු කෙරෙන බවයි බීබීසී පුවත් සේවය වැඩිදුරටත් සඳහන් කරන්නේ.
