සිර දඬුවම ක්රියාත්මක නොකරන්න හේතු ඇත්නම් කියන්නැයි ඥාණසාර හිමිට අධිකරණයෙන් නියෝගයක්..
1 min read
ඉස්ලාම් දහමට අපහාස වන ආකාරයෙන් ප්රකාශයක් සිදුකිරීම සම්බන්ධයෙන් වරදකරු කරමින් නියම කරන ලද සිරදඬුවම ක්රියාත්මක නොකිරීමට යම් සාධාරණ හේතුවක් ඇත්නම්, ඒ පිළිබඳව ලබන මස 01 වනදා අධිකරණය හමුවේ කරුණු දක්වන ලෙස කොළඹ අතිරේක මහේස්ත්රාත් ළහිරු සිල්වා මහතා බොදුබල සේනා සංවිධානයේ මහලේකම් පූජ්ය ගලගොඩඅත්තේ ඥානසාර හිමියන්ට නියෝග කළේය.
අදාළ නඩුව අධිකරණය හමුවේ කැඳවූ අවස්ථාවේදී ඥානසාර හිමියන් පෙනී නොසිටි අතර, උන්වහන්සේ අසනීප තත්ත්වයෙන් පසුවීම ඊට හේතුව බව උන්වහන්සේ වෙනුවෙන් පෙනී සිටි ජනාධිපති නීතිඥවරයා පැවසීය.
මහේස්ත්රාත් අධිකරණ තීන්දුවට එරෙහිව මහාධිකරණයට ඉදිරිපත් කළ ප්රතිශෝධන පෙත්සම ප්රතික්ෂේප වීමෙන් පසු මේ වන විට ශ්රේෂ්ඨාධිකරණය හමුවේ අභියාචනයක් ගොනු කර ඇති බැවින්, එම අභියාචනය සලකා බලා අවසන් වන තෙක් සිරදඬුවම ක්රියාත්මක කිරීම අත්හිටුවන ලෙස ජනාධිපති නීතිඥ අනුර මැද්දෙගොඩ මහතා මෙහිදී ඉල්ලා සිටියේය.
කෙසේ වෙතත්, ඉදිරිපත් වූ කරුණු සලකා බැලූ අතිරේක මහේස්ත්රාත්වරයා සඳහන් කළේ විත්තිකරු අධිකරණයේ පෙනී සිටීමෙන් අනතුරුව අදාළ කරුණු ඉදිරිපත් කළ යුතු බවයි. ඒ අනුව සිරදඬුවම ක්රියාත්මක නොකිරීමට හේතු දක්වන්නේ නම් ලබන මස 01 වනදා අධිකරණයේ පෙනී සිටින ලෙස නියෝග කෙරිණි.
2016 වසරේ කිරුළපන පැවැති ප්රවෘත්ති සාකච්ඡාවකදී ජාතීන් අතර සංහිඳියාවට බාධා වන පරිදි කටයුතු කිරීම සම්බන්ධයෙන් පොලිසිය විසින් පවරන ලද මෙම නඩුවේ තීන්දුව ප්රකාශයට පත් කරමින් මහේස්ත්රාත් අධිකරණය 2025 ජනවාරි 09 වන දින උන්වහන්සේට මෙම සිරදඬුවම නියම කර තිබුණි.
