ඉරාන උත්තරීතර නායක මොජ්ටාබා කමේනි අසාධ්ය තත්ත්වයෙන් රෝහල්ගත කරයි…
1 min read
ඉරානයේ උත්තරීතර නායක මොජ්ටාබා කමේනි අසාධ්ය තත්ත්වයෙන් රෝහල්ගත කර ඇති බවට ඊශ්රායල මාධ්ය වාර්තා කරයි. ඊශ්රායලයේ ‘චැනල් 14’ (Channel 14) පුවත් සේවය සහ ‘ජෙරුසලම් පෝස්ට්’ (Jerusalem Post) පුවත්පත වාර්තා කරන පරිදි, ඉරාන පාලන තන්ත්රයේ ඉහළම මට්ටම්වල මේ පිළිබඳව දැඩි කතාබහක් නිර්මාණය වී තිබේ.
2026 පෙබරවාරි 28 වැනිදා අමෙරිකානු සහ ඊශ්රායල ඒකාබද්ධ හමුදා ප්රහාරයකින් සිය පියා මියයාමෙන් පසු මොජ්ටාබා කමේනි උත්තරීතර නායක ධුරයට පත් විය.
එතැන් සිට ඔහු ප්රසිද්ධියේ පෙනී නොසිටි අතර ලිඛිත ප්රකාශ හරහා පමණක් සන්නිවේදනය කළ බව වාර්තා වේ. සිය පියා ඉලක්ක කර එල්ල වූ ප්රහාරයේදී මොජ්ටාබා කමේනි ද බරපතළ තුවාල ලබා ඇති බවත්, එම තුවාල හේතුවෙන් ඔහු සැඟවී සිටින බවත් වාර්තා පවසයි.
මේ අතර, අමෙරිකානු ජනාධිපති ඩොනල්ඩ් ට්රම්ප් ද ‘ෆොක්ස් නිවුස්’ නාලිකාව සමග පැවති සම්මුඛ සාකච්ඡාවකදී ප්රකාශ කර තිබුණේ ඉරාන නායකයා සියයට 90ක්ම අකර්මන්ය වී ඇති බවයි.
සෞදි අරාබියේ ‘අල්-හදත්’ පුවත් සේවය ද ඊශ්රායල ආරක්ෂක අංශ උපුටා දක්වමින් මීට පෙර වාර්තා කර තිබුණේ කමේනි මේ වන විට ඉරානය තුළ පවා නොමැති බවයි.
කෙසේ වෙතත්, ඉරාන රජයේ නිලධාරීන් මෙම වාර්තා දිගින් දිගටම ප්රතික්ෂේප කර තිබේ. ඉරාන සෞඛ්ය අමාත්යාංශය මීට පෙර ප්රකාශ කර තිබුණේ ඔහුගේ තුවාල සුළු මට්ටමේ ඒවා බවයි. ඔහු තවදුරටත් රටේ උපායමාර්ගික කටයුතු සහ මෙහෙයුම් සඳහා උපදෙස් ලබා දෙමින් සිටින බව ඉරාන බලධාරීන් අවධාරණය කරයි.
එහෙත් ඔහු ප්රසිද්ධියේ පෙනී නොසිටීම හේතුවෙන් ඔහුගේ සෞඛ්ය තත්ත්වය සහ නායකත්වයේ ස්ථාවරභාවය පිළිබඳව ජාත්යන්තරයේ පවතින සැකය තවදුරටත් වර්ධනය වී තිබේ.
