කැනඩාව දිගින් දිගටම LTTEය තහනම් කරන එක ගැන ඉලංකෙයි තමිල් අරසු පක්ෂය කනස්සල්ලෙන්..
1 min read
කැනඩාව විසින් එල්.ටී.ටී.ඊ. (LTTE) සංවිධානය තහනම් කර ඇති ලැයිස්තුව නැවත සමාලෝචනය කරන ලෙස ඉලංගෙයි තමිල් අරසු පක්ෂයේ (ITAK) පාර්ලිමේන්තු මන්ත්‍රී සිවඥානම් ශ්‍රීධරන් කැනඩා කොන්සර්වේටිව් පක්ෂයේ මන්ත්‍රීවරුන්ගෙන් ඉල්ලීමක් කර තිබේ.
ඔටාවා හි පාර්ලිමේන්තු සංකීර්ණයේ පැවති හමුවකදී මෙම ඉල්ලීම සිදු කර ඇති බව Tamil Guardian පුවත වාර්තා කරයි.
යාපනය දිස්ත්‍රික්කය නියෝජනය කරන ශ්‍රීධරන් මන්ත්‍රීවරයා, කැනඩා කොන්සර්වේටිව් පක්ෂ මන්ත්‍රීවරුන් වන ෂුවලෝයි මජුම්දාර් සහ කොස්ටාස් මෙනෙගාකිස් මෙන්ම විපක්ෂ නායක කාර්යාලයේ නියෝජිතයෙකුද හමුවී මෙම සාකච්ඡාව පවත්වා ඇත.
2006 වසරේදී කැනඩාව විසින් එල්.ටී.ටී.ඊ. සංවිධානය තහනම් කිරීම හේතුවෙන් සාකච්ඡාමය විසඳුමක් කරා යාමට තිබූ උත්සාහයන් අඩපණ වූ බවත්, එමගින් ශ්‍රී ලංකා රජයට එල්ල වන ජාත්‍යන්තර බලපෑම දුර්වල වූ බවත් ඔහු මෙහිදී පෙන්වා දී තිබේ. සන්නද්ධ ගැටුම් අවසන් වී වසර 17ක් ගතවී තිබුණද යළි කිසිදු සන්නද්ධ නැගී සිටීමක් සිදුව නැති නමුත්, ද්‍රවිඩ ජනතාවට තවමත් නිසි දේශපාලන විසඳුමක් ලැබී නොමැති බවද ඔහු අවධාරණය කරයි.
එමෙන්ම, දැනට මිනිස් අස්ථි කොටස් 583ක් සොයාගෙන ඇති චෙම්මනි සමූහ මිනීවල පිළිබඳ විමර්ශන සඳහා ජාත්‍යන්තර විශේෂඥයින්ගේ සහභාගීත්වයෙන් යුත් ස්වාධීන අධිකරණ වෛද්‍ය පරීක්ෂණයක් පවත්වන ලෙසත්, ඊට අවශ්‍ය වෛද්‍ය විශේෂඥ දැනුම හා උපකරණ ලබා දෙන ලෙසත් මන්ත්‍රීවරයා කැනඩාවෙන් ඉල්ලා ඇත.
මීට අමතරව ශ්‍රී ලංකා හමුදාව භාරයේ පවතින කේප්පාපිලවු හි අක්කර 171ක ඉඩම් ප්‍රමාණය සහ වලිගාමම් උතුරේ අක්කර 2,117ක ඉඩම් ප්‍රමාණය නැවත ලබා දීමට කටයුතු කරන ලෙසද ඔහු ඉල්ලා තිබේ.
මෙම හමුවට පෙර, කැනඩා විදේශ කටයුතු අමාත්‍යාංශයේ ඉන්දු-පැසිෆික් කලාපය භාර සහකාර නියෝජ්‍ය අමාත්‍ය වෙල්ඩන් එප් ඇතුළු නිලධාරීන් පිරිසක් හමුවී අතුරුදහන් කරවීම්, ඉඩම් අත්පත් කරගැනීම් සහ ද්‍රවිඩ ජනතාව මුහුණපා ඇති ගැටලු පිළිබඳවද සාකච්ඡා කර ඇති අතර, මෙම සියලු කරුණු සම්බන්ධයෙන් තම පක්ෂ නායකත්වය දැනුවත් කිරීමට කැනඩා පාර්ලිමේන්තු මන්ත්‍රීවරුන් එකඟ වී තිබේ.
