වනාතවිල්ලුව පුපුරන ද්‍රව්‍ය නඩුව: විත්තිකරුවන් දෙදෙනෙකු වරද පිළිගැනීමට සැරසෙයි..
1 min read
2018 වසරේදී වනාතවිල්ලුව, ලැස්ටෝස් වත්තේදී නීති විරෝධී ලෙස ගිනි අවි සහ පුපුරන ද්‍රව්‍ය රැස්කර තැබීමේ සිදුවීමට අදාළව පවරා ඇති නඩුවේ විත්තිකරුවන් දෙදෙනෙකු තමන්ට එරෙහි චෝදනාවලට වරද පිළිගැනීමට සූදානම් බව අධිකරණයට දැනුම් දී තිබේ.
මෙලෙස වරද පිළිගැනීමට සූදානම් බව ප්‍රකාශ කර ඇත්තේ ඇප මත මුදාහැර සිටින අබු හනීෂා මොහොමඩ් මුසීත් (අබු දහිදා) සහ අමිර් හමසා මොහොමඩ් හමාස් යන විත්තිකරුවන් දෙදෙනාය.
නීතිපතිවරයා විසින් අධිචෝදනා 14ක් යටතේ නඩ පවරා ඇති විත්තිකරුවන් 6 දෙනා අතරින් 4 දෙනෙකුම පාස්කු ඉරිදා ප්‍රහාරය පිළිබඳ මහ නඩුවේද විත්තිකරුවෝ වෙති.
2018 වසරේදී අපරාධ පරීක්ෂණ දෙපාර්තමේන්තුව (CID) විසින් මෙම වත්තේ තිබී නයිට්‍රේට් තොගයක්, ජීව උණ්ඩ 12ක්, ගිනි අවියක් මෙන්ම නයිට්‍රජන් ඇසිඩ් සහ යූරියා ඇතුළු පුපුරන ද්‍රව්‍ය නිෂ්පාදනයට ගන්නා ද්‍රව්‍ය රැසක් අත්අඩංගුවට ගෙන තිබිණි.
ලාල් රණසිංහ බණ්ඩාර, රශ්මි සිංගප්පුලි සහ නයෝමි වික්‍රමසේකර යන ත්‍රිපුද්ගල විනිසුරු මඩුල්ල හමුවේ නඩුව කැඳවූ අතර, මේ පිළිබඳ වැඩිදුර කරුණු දැක්වීම් සඳහා නඩුව ඔක්තෝබර් 05 වනදා නැවත කැඳවීමට නියෝග කෙරිණි.
එදින සිට නඩු විභාගය දිනපතා පවත්වන බවද විනිසුරු මඩුල්ල වැඩිදුරටත් සඳහන් කළේය.
