මුදල් අමාත්‍යාංශය තැපැල් පෙට්ටියක් වෙලා…!

ජාතික සංවර්ධන බැංකුවේ (NDB) සිදුවූ රුපියල් බිලියන 13.2ක මූල්‍ය වංචාව සම්බන්ධයෙන් ශ්‍රී ලංකා මහබැංකුවේ ප්‍රතිචාරය දැඩි ලෙස විවේචනය කළ පාර්ලිමේන්තු මන්ත්‍රී රවී කරුණානායක, “මුදල් අමාත්‍යාංශය දැන් තැපැල් පෙට්ටියක් බවට පත්වෙලා” යැයි පාර්ලිමේන්තුවේදී ප්‍රකාශ කළේය.

මුදල් හා ක්‍රමසම්පාදන නියෝජ්‍ය අමාත්‍ය අනිල් ජයන්ත මහතා මහබැංකුව උපුටා දක්වමින් ලබාදුන් පිළිතුරු ප්‍රමාණවත් නොවන අතර ඒවා පරස්පර විරෝධී බවද ඔහු පැවසීය.

මහබැංකුව තම නියාමන හා අධීක්ෂණ වගකීම් නිසි ලෙස ඉටු කර නොමැති බවට චෝදනා කළ රවී කරුණානායක මහතා, “දිනෙන් දින මහබැංකුවෙන් ලැබෙන පිළිතුරුවල ගුණාත්මකභාවය පිරිහෙනවා. පාර්ලිමේන්තුවටත් නිවැරදි තොරතුරු ලැබෙන්නේ නැහැ” යැයි සඳහන් කළේය.

නියෝජ්‍ය අමාත්‍යවරයා පැවසුවේ, බැංකු අධීක්ෂණ දෙපාර්තමේන්තුව (BSD) අවදානම් පාදක කරගත් අධීක්ෂණයක් පමණක් සිදු කරන අතර, මූල්‍ය බුද්ධි ඒකකය (FIU) සැකකටයුතු ගනුදෙනු පිළිබඳ තොරතුරු අපරාධ පරීක්ෂණ දෙපාර්තමේන්තුව (CID) වෙත යොමු කර ඇති බවයි.

එසේම, වංචාවේ වටිනාකම රුපියල් බිලියන 13.2ක් බවත්, NDB බැංකුවේ රුපියල් බිලියන 2.7ක ලාභාංශ ගෙවීම අත්හිටුවා ඇති බවත්, Deloitte Tohmatsu India LLP ආයතනය මගින් ස්වාධීන Forensic Audit විගණනයක් ආරම්භ කර ඇති බවත් ඔහු පැවසීය.

ජනප්‍රිය පුවත් අද උදෑසන සිට දිවයින පුරා රෝහල්වල වෛද්‍ය වර්ජනයක්!

කෙසේ වෙතත්, Deloitte ආයතනයේ අභ්‍යන්තර වාර්තාවල රුපියල් බිලියන 13.5ක අලාභයක් සඳහන් වන අතර, මහබැංකුව රුපියල් බිලියන 13.2ක අගයක් ඉදිරිපත් කරන්නේ කෙසේදැයි රවී කරුණානායක මහතා ප්‍රශ්න කළේය.

“ගනුදෙනු 3,000කට වැඩි ප්‍රමාණයක් සිදුවෙද්දීත් බැංකු අධීක්ෂණ දෙපාර්තමේන්තුවට එහි රටාව හඳුනාගත නොහැකි වුණා නම්, අපේ මූල්‍ය පද්ධතිය බරපතළ අනතුරක තිබෙනවා,” යැයිද ඔහු අනතුරු ඇඟවීය.

අවසානයේ ඔහු රජයෙන් ඉල්ලා සිටියේ, මහජන විශ්වාසය ආරක්ෂා කිරීම සඳහා මහබැංකුව මෙම සිද්ධිය සම්බන්ධයෙන් පූර්ණ විනිවිදභාවයකින් යුතුව නිවැරදි පැහැදිලි කිරීමක් පාර්ලිමේන්තුවට ඉදිරිපත් කළ යුතු බවයි.