දේපළ මත ද්වීතියික බද්දක් පනවන ලෙස ජාත්‍යන්තර මූල්‍ය අරමුදලෙන් දැනුම්දීමක්
1 min read
2027 අයවැය යෝජනා මගින් ද්විතීයික දේපළ බද්දක් හඳුන්වා දීමට ජාත්‍යන්තර මූල්‍ය අරමුදල කළ යෝජනාව සම්බන්ධයෙන් රජය සහ එම අරමුදල අතර මතභේදයක් හටගෙන ඇති බව සන්ඩේ ටයිම්ස් වාර්තා කරයි.
අතිරේක හෝ ද්විතීයික නිවාස සහ දේපළ ඉලක්ක කර ගනිමින් මෙම බද්ද ඉදිරි අයවැයට ඇතුළත් කළ යුතු බවට මූල්‍ය අරමුදල අවධාරණය කර ඇත. කෙසේ වෙතත්, රජයේ ස්ථාවරය වී ඇත්තේ දැනටමත් ක්‍රියාත්මක කර ඇති අනෙකුත් ආදායම් මාර්ග හරහා නියමිත මූල්‍ය ඉලක්ක සපුරා ඇති බැවින්, මෙවැනි අලුත් බද්දක අවශ්‍යතාවක් පැන නොනගින බවයි.
ශ්‍රී ලංකාවේ විස්තීර්ණ අරමුදල් පහසුකම් වැඩසටහන යටතේ 2023 වසරේ සිට ක්‍රියාත්මක වන ආදායම් වැඩිකිරීමේ උපායමාර්ගයක් ලෙස, දෙවන සහ ඉන් පසුව හිමිවන නිවාස සඳහා බදු පැනවීමේ අදහස ජාත්‍යන්තර මූල්‍ය අරමුදල විසින් ඉදිරිපත් කර තිබේ.
එහෙත් රජය පෙන්වා දෙන්නේ 2027 අයවැය සඳහා යෝජිත ආදායම් මාර්ග ප්‍රමාණවත් බැවින් මෙම බද්ද හඳුන්වා දීම අත්‍යවශ්‍ය නොවන බවයි.
මීට අමතරව, මෙරට දේපළ අයිතිය පිළිබඳ නිසි දත්ත පද්ධතියක් සකස් කිරීමට සැලකිය යුතු කාලයක් ගතවන බැවින්, එවැනි බද්දක් කඩිනමින් ක්‍රියාත්මක කිරීම ප්‍රායෝගික නොවන බව ද රජය පෙන්වා දී ඇත.
කෙසේ වෙතත්, 2027 අයවැයට මෙය ඇතුළත් නොවුවද, ඉදිරියේදී මෙම බද්ද පැනවීම සඳහා මූල්‍ය අරමුදල දිගින් දිගටම බලපෑම් කිරීමට ඉඩ ඇති බව පුවත්පත වාර්තා කරයි.
මෙම දේපළ බදු ක්‍රියාවලිය සම්බන්ධයෙන් මීට පෙර ද නීතිමය සහ තාක්ෂණික බාධා රැසක් මතු විය. විශේෂයෙන්ම 13 වැනි ආණ්ඩුක්‍රම ව්‍යවස්ථා සංශෝධනයට අනුව දේපළ ආශ්‍රිත බදු ආදායම පළාත් සභාවලට හිමිවන බැවින්, මධ්‍යම රජයට සෘජුවම බදු පැනවීමට නීතිමය බාධා පවතී. එමෙන්ම තක්සේරු දෙපාර්තමේන්තුව සතුව මෙරට පවතින දේපළ මිලියන පහකට අධික ප්‍රමාණය පිළිබඳ යාවත්කාලීන දත්ත නොමැති වීම ද මෙහි ඇති ප්‍රධාන ගැටලුවකි.
