එල්නිනෝවෙන් ජුනි ජූලි මාසවල වැස්සේ සැර බහී
1 min read
එල්නිනෝ බලපෑම මත වයඹ, සබරගමුව යන පළාත්වලටත්, මහනුවර, නුවරඑළිය වැනි දිස්ත්රික්කවලට ජූනි, ජූලි සහ අගෝස්තු මාසවලදී අපේක්ෂිත වර්ෂාපතනයට වඩා අඩු වර්ෂාපතනයක් ලැබෙනු ඇතැයි කාලගුණ විද්යා දෙපාර්තමේන්තුවේ අධ්යක්ෂ (අනාවැකි) මෙරිල් මෙන්ඩිස් පැවසීය.
එල්නිනෝ තත්ත්වය ජූනි මාසයේදී බලාපොරොත්තු වන බවද ඔහු පැවසුවේය.
එල්නිනෝ තත්ත්වය මෝසම් තත්ත්වයට බලපෑමක් එල්ල කළත්, එය විශාල බලපෑමක් නොවන බවට දැනට පුරෝකථනය කර තිබෙන බවද ඔහු කියා සිටියේය.
එල්නිනෝ වැනි තත්ත්වයන් සමග මෝසම් ප්රවාහය මඳක් දුර්වල කරන බවත්, මේ නිසා අපේක්ෂිත වර්ෂාපතනයට වඩා අඩු වර්ෂාපතනයක් ලැබීමේ ඉඩකඩ වැඩි බවද ඔහු කීවේය.
කෙසේ නමුත්, දිවයිනේ අනෙකුත් පළාත්වලට සාමාන්ය වර්ෂාපතන තත්ත්වයම අපේක්ෂා කරන බවද අධ්යක්ෂවරයා පැවසුවේය.
නිරිත දිග මෝසමේ දායකත්වය වාර්ෂික වර්ෂාපතනයෙන් සියයට 26 ක් පමණ බවත්, ඉන් වැඩි ප්රමාණයක් ලැබෙන්නේද මෙරට නිරිත දිග කොටසට බවත්, එනම්, බස්නාහිර, සබරගමුව, වයඹ පළාත් වලටත්, මහනුවර, නුවරඑළිය, ගාල්ල, මාතර යන දිස්ත්රික්කවලට බවද ඔහු කියා සිටියේය.
උතුරු, උතුරු මැද, නැගෙනහිර පළාත්වලට නිරිත දිග මෝසමෙන් ලැබෙන වර්ෂාපතනය අඩු බවද ඔහු පැවසීය.
නිරිත දිග මෝසම මැයි මාසයේ අග ආරම්භ වී සැප්තැම්බර් මාසයේ අග දක්වාම ක්රියාත්මක වන බවත්, සාමාන්යයෙන් ජුනි, ජූලි වලදී වර්ෂාපතනය අඩු බවද ඔහු කීවේය.
මධ්යම කඳුකරයේ විශාල විදුලි බලාගාර වන වික්ටෝරියා, රන්දෙනිගල ආදිය පිහිටා ඇත්තේ මධ්යම කඳුකරයේ නැගෙනහිර බෑවුමේ බවත්, එම ජලාශවලට වඩා නිරිත දිග මෝසමෙන් වර්ෂාපතනය ලැබෙන්නේ ලක්ෂපාන, කොත්මලේ ආදී කඳුකරයේ බටහිර බෑවුමේ ජලාශවලට බවද ඔහු පැවසීය.
