සෞදියට දැවැන්ත ප‍්‍රහාරයක්..
1 min read
සෞදි අරාබියේ අගනුවර පිහිටි රියාද් ජාත්‍යන්තර ගුවන්තොටුපොළ ඉලක්ක කර ගනිමින් එල්ල වූ දරුණුතම මිසයිල ප්‍රහාරයකින් පුද්ගලයින් 12 දෙනෙකු ජීවිතක්ෂයට පත්ව, 300කට අධික පිරිසක් තුවාල ලබා ඇති බව එරට සිවිල් ගුවන් සේවා බලධාරීන් ප්‍රකාශ කළ බව ඇසෝසියේටඩ් ප්‍රෙස් (AP) පුවත් සේවය වාර්තා කරයි. තුවාල ලැබූවන්ගෙන් කිහිප දෙනෙකුගේ තත්ත්වය බරපතළ බවද සඳහන් වේ. යේමනයේ ක්‍රියාත්මක ඉරාන සහාය ලබන හූති කැරලිකරුවන් විසින් මෙම ප්‍රහාරය එල්ල කර ඇති බවට සෞදි නායකත්වයෙන් යුත් ඒකාබද්ධ හමුදා සන්ධානය චෝදනා කරයි.Read Daily News
කලාපීය නිලධාරියෙකු උපුටා දක්වමින් AP පුවත් සේවය වාර්තා කරන්නේ, අභ්‍යන්තර ගුවන් ගමන් සඳහා භාවිත කෙරෙන ‘කිං කාලිඩ්’ ජාත්‍යන්තර ගුවන් තොටුපොළ පරිශ්‍රයේ අංක 3 සහ 4 පර්යන්ත වෙත මෙම මිසයිල ප්‍රහාරය එල්ල වී ඇති බවයි.
සෞදි බලධාරීන් නිකුත් කළ නිල නිවේදනයකට අනුව, මියගිය පිරිස අතර සෞදි ජාතිකයින් සිව්දෙනෙකු, බංග්ලාදේශ ජාතිකයින් දෙදෙනෙකු සහ ඇමරිකානු, පලස්තීන, ඊජිප්තු, ජෝර්දාන, සිරියානු මෙන්ම සුඩාන ජාතිකයෙකු බැගින් ඇතුළත් වේ. තුවාල ලැබූවන් රෝහල් කිහිපයකම දැඩි ප්‍රතිකාර ලබමින් සිටිති.
මෙම ප්‍රහාරය සම්පූර්ණ යුද අපරාධයක් ලෙස හෙළා දකින සෞදි හමුදා සන්ධානය, ඊට එරෙහිව දැඩි ප්‍රතිචාර දක්වන බවට අනතුරු අඟවා ඇත. සිවිල් පහසුකම් පමණක් පවතින මෙම ගුවන් තොටුපොළ වෙත එල්ල වූ ප්‍රහාරයෙන් පසු ගුවන් මෙහෙයුම් තාවකාලිකව අත්හිටුවීමට පියවර ගැනිණි.
මේ අතර, හූති කැරලිකරුවන්ට එරෙහිව සෞදි අරාබිය ක්‍රියාත්මක කරන හමුදා මෙහෙයුම් සඳහා ඇමරිකා එක්සත් ජනපදය සෘජුව මැදිහත් වන්නේද යන්න පිළිබඳව සලකා බලමින් සිටින බව අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර තිබේ. “සෞදි අරාබියේ සිදුවූ දෙය කිසිසේත්ම පිළිගත නොහැකියි,” යනුවෙන් ප්‍රකාශ කළ ජනාධිපතිවරයා, මේ සම්බන්ධයෙන් සෞදි ඔටුන්න හිමි මොහොමඩ් බින් සල්මාන් කුමරු සමග සාකච්ඡා කිරීමට අපේක්ෂා කරන බවද සඳහන් කළේය.
ප්‍රහාරයෙන් ඇමරිකානු ජාතිකයෙකු මියයාම හෙළා දකිමින් අමෙරිකානු රාජ්‍ය ලේකම් මාර්කෝ රූබියෝ අවධාරණය කළේ, මෙවැනි පහත් ක්‍රියා මගින් අහිංසක සිවිල් ජීවිත නොසලකා හැරීමක් පෙන්නුම් කරන බවත්, මෙම ප්‍රහාර වහාම නැවැත්විය යුතු බවත්ය.
හූති සටන්කාමීන් සෞදි ගුවන් සීමාව සිය හමුදා මෙහෙයුම් කලාපයක් ලෙස ප්‍රකාශයට පත් කරමින් ගෝලීය ගුවන් සේවාවලට අනතුරු ඇඟවීමත් සමග, එයාර් ඉන්දියා, ෆ්ලයි ඩුබායි, ලුෆ්තාන්සා සහ පකිස්ථාන ජාත්‍යන්තර ගුවන් සේවය ඇතුළු ප්‍රමුඛ පෙළේ ගුවන් සේවා සමාගම් රැසක් රියාද් සහ සෞදියේ අනෙකුත් ප්‍රධාන නගර වෙත ගමන් වාර තාවකාලිකව අත්හිටුවා ඇත. යුරෝපා සංගමයේ ගුවන් සේවා ආරක්ෂණ ඒජන්සිය (EASA) ද සෞදි ගුවන් සීමාව භාවිත කිරීම සම්බන්ධයෙන් විශේෂ ආරක්ෂක මාර්ගෝපදේශ නිකුත් කර තිබේ.
මිසයිල නාශක පද්ධති හිඟයකට මුහුණ දී සිටින සෞදි අරාබිය, බ්‍රිතාන්‍යය, ප්‍රංශය, පකිස්ථානය සහ ඊජිප්තුව වැනි මිත්‍ර රටවලින් ගුවන් ආරක්ෂණ ආධාර ඉල්ලා ඇති බවද වාර්තා වේ.
Share0
