ටියුනීසියානු ජනපතිට එරෙහිව දැවැන්ත විරෝධතා
1 min read
ටියුනීසියානු ජනාධිපති කයිස් සයිඩ්ට වහාම ධුරයෙන් ඉල්ලා අස්වන ලෙස බලකරමින් දහස් සංඛ්‍යාත ජනතාවක් එරට අගනුවර වන ටියුනිස්හි දැවැන්ත විරෝධතාවල නිරත වෙමින් සිටිති.
දිනෙන් දින නරක අතට හැරෙන ජීවන තත්ත්වය, ප්‍රජාතන්ත්‍රවාදය කඩාවැටීම මෙන්ම රජයේ අකාර්යක්ෂම ආර්ථික කළමනාකරණයට එරෙහිව මෙම විරෝධතා සංවිධානය කර ඇත.
වත්මන් ජනාධිපතිවරයා බලයට පැමිණීමෙන් පසු එරට පාර්ලිමේන්තුව අත්හිටුවීමට පියවර ගත් අතර, ඊට එරෙහිව වසර පහකට පසු එල්ල වූ දැවැන්තම ජනතා විරෝධය මෙය ලෙස සැලකේ.
ජනාධිපතිවරයා විසින් හදිසි බලතල අත්පත් කර ගැනීමෙන් පසු එරට දේශපාලන සිරකරුවන් ප්‍රමාණය සීඝ්‍රයෙන් ඉහළ ගොස් ඇති බවත්, වහාම ඔවුන් නිදහස් කළ යුතු බවත් විරෝධතාකරුවෝ පුවරු ප්‍රදර්ශනය කරමින් පවසති.
මෙම විරෝධතා සාම්ප්‍රදායික විරුද්ධ පක්ෂවලට පමණක් සීමා නොවී, රටේ පවතින දරුණු ආර්ථික අර්බුදය සහ පොදු සේවාවන් බිඳවැටීම නිසා පීඩාවට පත් සාමාන්‍ය පුරවැසියන්ගේ පුළුල් සහභාගිත්වයකින් යුක්ත වීම කැපී පෙනේ.
ටියුනීසියාවේ වසර ගණනාවක් පුරා පැවති සිවිල් නොසන්සුන්තාවයකින් පසු, 2011 ජනවාරි මාසයේදී එවකට සිටි දිගුකාලීන ඒකාධිපති ජනාධිපති සයින් එල් අබිදීන් බෙන් අලිට ධුරය අත්හැරීමට සිදු විය.
ඉන් අනතුරුව එරට පළමු නිදහස් මැතිවරණය පවත්වා දේශපාලන නිදහස සහතික කරන නව ව්‍යවස්ථාවක් ද සම්මත කර ගනු ලැබීය.
කෙසේ වෙතත්, වත්මන් ජනාධිපතිවරයාගේ ඒකාධිපති ක්‍රියාකලාපය හේතුවෙන් එම දේශපාලන නිදහස සහ ප්‍රජාතන්ත්‍රවාදී ජයග්‍රහණ මේ වන විට බරපතළ තර්ජනයකට ලක්ව ඇති බව විචාරකයෝ පවසති.හන්ය.
