ඊශ්රායල හමුදාව ඇතුළතින්ම කඩා වැටීමේ අවදානමක්! ආරක්ෂක ප්රධානීන්ගෙන් අනතුරු ඇඟවීමක්!
1 min read
බටහිර ආසියානු කලාපයේ පවතින යුද ගැටුම් හේතුවෙන් ඊශ්රායල හමුදාව (IDF) දැඩි මෙහෙයුම් පීඩනයකට සහ මානව සම්පත් හිඟයකට මුහුණ දී සිටින බව ඊශ්රායල ආරක්ෂක බලකායේ මාණ්ඩලික ප්රධානී ලුතිනන් ජෙනරාල් ඒයල් සාමීර් (Eyal Zamir) අවධාරණය කරයි. “ටයිම්ස් ඔෆ් ඊශ්රායෙල්” පුවත්පත වාර්තා කරන පරිදි, පවතින තත්ත්වය හමුවේ ඊශ්රායල හමුදාව “තමන් තුළින්ම කඩා වැටිය හැකි” බවට ඔහු ආරක්ෂක කැබිනට් මණ්ඩල රැස්වීමකදී අනතුරු අඟවා තිබේ. හමුදාවේ සූදානම පිළිබඳ බරපතල කනස්සල්ලක් පළ කරමින් ඔහු අමාත්යවරුන් හමුවේ ප්රකාශ කර ඇත්තේ තමන් “රතු කොඩි 10ක්” ඔසවන බවයි.
හමුදාව මුහුණ දී සිටින මෙම අර්බුදයෙන් මිදීම සඳහා අනිවාර්ය හමුදා සේවා කාලය දීර්ඝ කිරීම සහ බඳවා ගැනීමේ නීති සංශෝධනය කිරීම වැනි හදිසි ව්යවස්ථාදායක පියවරයන් ගත යුතු බව ලුතිනන් ජෙනරාල් ඒයල් සාමීර් පෙන්වා දෙයි. එවැනි පියවරක් නොගතහොත් සාමාන්ය මෙහෙයුම් පවත්වාගෙන යාමට සහ සංචිත බළඇණි කළමනාකරණය කිරීමට හමුදාවට නොහැකි වනු ඇතැයි ඔහු පවසයි. 2023 ඔක්තෝබර් 7 ප්රහාරයෙන් පසු ඇරඹි ගාසා යුද්ධයත් සමඟ මෙම මානව හිඟය උත්සන්න වී ඇති අතර, මේ වන විට හමුදාවට භට පිරිස් 12,000ක පමණ හිඟයක් පවතින බවට නීති සම්පාදකයින්ට ද දැනුම් දී තිබේ.
මෙම ගැටලුව සම්බන්ධයෙන් ඔහු මීට පෙර අවස්ථා කිහිපයකදීම අගමැති බෙන්ජමින් නෙතන්යාහු ඇතුළු ජ්යෙෂ්ඨ නිලධාරීන් දැනුවත් කර ඇති බව වාර්තා වේ. විශේෂයෙන්ම හමුදා සේවයෙන් නිදහස් කිරීම් සම්බන්ධයෙන් පවතින දේශපාලන විවාදයන් මෙම තත්ත්වය තවදුරටත් සංකීර්ණ කර ඇති බව විචාරකයෝ පවසති. මෙහෙයුම් සූදානම පිරිහීම රටේ ආරක්ෂාවට ඍජු තර්ජනයක් විය හැකි බැවින්, යුද හමුදාව ශක්තිමත් කිරීමට අවශ්ය කඩිනම් පියවර ගැනීම ඊශ්රායල රජය හමුවේ ඇති ප්රධානතම අභියෝගයකි.
