නේපාලයේ වැනි විපත් මෙරටත් ඇතිවිය හැකියි.. – මහාචාර්ය අතුල සේනාරත්නගෙන් අනතුරු ඇඟවීමක්
1 min read
නේපාලයේ සිදුවූ ආකාරයේ දැවැන්ත ස්වාභාවික විපත් කුඩා පරිමාණයෙන් හෝ ශ්රී ලංකාව තුළ ඕනෑම මොහොතක සිදුවීමේ අවදානමක් පවතින බව පේරාදෙණිය විශ්වවිද්යාලයේ භූගර්භ හා භූ විද්යා අධ්යයන අංශයේ හිටපු ජ්යෙෂ්ඨ මහාචාර්ය අතුල සේනාරත්න මහතා පවසයි.
මෙම තත්ත්වය ශ්රී ලංකාවට හොඳ පාඩමක් කියාදෙන බව පෙන්වා දෙන ඒ මහතා, මෑතකදී ඇතිවූ ‘දිට්වා’ සුළි කුණාටුව අතරතුර සරසවිගම ප්රදේශයේ සිදුවූ නායයෑම ඊට හොඳම උදාහරණය බව සඳහන් කළේය. එම නායයෑම නිසා ඇළ මාර්ගයක් අවහිර වී මුළු ගම්මානයම යටවීමෙන් පුද්ගලයින් 20 දෙනෙකුට අධික පිරිසක් ජීවිතක්ෂයට පත් විය.
ගංගා සහ ඇළ දොළ ආසන්නයේ ඇති දිරාපත් වූ පාෂාණ හා පස් තට්ටු නායයාමෙන් ජල මාර්ග අවහිර වන අතර, පසුව එම ජලකඳ එකවර බිඳී යාමෙන් නොසිතූ මොහොතක දැවැන්ත ජලගැලීම් නිර්මාණය විය හැකි බව මහාචාර්යවරයා පෙන්වා දෙයි.
එබැවින් සාමාන්ය නායයෑම් සිතියම්ගත කරනවා සේම, මෙලෙස ජල මාර්ග අවහිර වී ක්ෂණික ජල ගැලීම් ඇතිවිය හැකි අවදානම් සහිත ප්රදේශ ද කඩිනමින් සිතියම්ගත කර පූර්ව අනතුරු ඇඟවීම් නිකුත් කිරීමේ වැදගත්කම ඒ මහතා අවධාරණය කරයි.
