රටට විදේශ විනිමය ගේන ඇඟළුම් කර්මාන්තශාලා වැසී යෑමේ අවධානමක – විපක්ෂ නායක සජිත් ප්‍රේමදාස
1 min read
වත්මන් ආණ්ඩුව බලයට පත්වීමට පෙර ජනතාවට ලබා දුන් කිසිදු පොරොන්දුවක් මෙතෙක් ඉටු කර නොමැති බවත්, ඒ හේතුවෙන් මෙරට සමස්ත ජනතාවම දැඩි පීඩනයකට සහ අසහනයකට පත්ව ඇති බවත් විපක්ෂ නායක සජිත් ප්‍රේමදාස මහතා පවසයි. ජන හමුවක් අමතමින් විපක්ෂ නායකවරයා කියා සිටියේ තරුණ පරපුර, දරු පරපුර මෙන්ම මව්වරුන් ද අද වන විට බරපතල ආර්ථික දුෂ්කරතාවලට මුහුණ දී සිටින බවයි.
ගොවි, ධීවර සහ කම්කරු ජනතාවගේ අයිතිවාසිකම් රජය විසින් උදුරාගෙන ඇති බවට ද ඔහු චෝදනා කළේය.
විදුලි බිල සියයට 33කින් අඩු කරන බවටත්, රුපියල් 9000ක බිල 6000 දක්වාත්, 3000ක බිල 2000 දක්වාත් අඩු කරන බවට දුන් පොරොන්දු මෙතෙක් ඉටු වී නොමැති බව ඔහු පෙන්වා දුන්නේය.
එමෙන්ම, ඉන්ධන මත පනවා ඇති බදු ඉවත් කර වරායට ගොඩබාන මිලටම ඉන්ධන ලබා දෙන බවට කළ ප්‍රකාශ ද අමතක කර ඇති බව ඔහු පැවසීය.
තරුණ පරපුර වෙනුවෙන් රුපියල් ලක්ෂ 12කට ‘විිට්ස්’ වර්ගයේ වාහන සහ අඩු මිලට මෝටර් සයිකල් ලබා දෙන බවට දුන් පොරොන්දු ද ඉටු කර නොමැති බවත්, අද වන විට රටේ ජනගහනයෙන් සියයට 30ත් 40ත් අතර ප්‍රමාණයක් දරිද්‍රතාවයෙන් පෙළෙන බවත් විපක්ෂ නායකවරයා අවධාරණය කළේය.
රණසිංහ ප්‍රේමදාස මහතා ආරම්භ කළ ඇඟලුම් කර්මාන්තශාලා පවා අද වන විට වැසී යමින් පවතින බවත්, නව රැකියා උත්පාදනයක් හෝ විදේශ ආයෝජන රටට නොපැමිණෙන බවත් ඔහු සඳහන් කළේය.
වන අලි ගැටලුව වැනි බරපතල ප්‍රශ්න සඳහා විද්‍යාත්මක විසඳුම් ලබා දෙන බව පැවසුව ද, ප්‍රායෝගිකව කිසිදු පියවරක් ගෙන නොමැති බව ඔහු වැඩිදුරටත් පැවසීය.
සමගි ජන බලවේගය ආණ්ඩුවක් යටතේ ගම් සහ නගර දියුණු කරමින්, කෘෂිකර්මාන්තය, සේවා සහ කර්මාන්ත ක්ෂේත්‍ර ශක්තිමත් කරන බවත්, මන්දපෝෂණය තුරන් කර ජනතාවගේ ජීවත්වීමේ අයිතිය තහවුරු කරන නව බලාපොරොත්තුවක් රටට ලබා දෙන බවත් සජිත් ප්‍රේමදාස මහතා මෙහිදී අවධාරණය කළේය.
