පාස්කු ඉරිදා ත්‍රස්ත ප්‍රහාරය.. බුද්ධි නිලධාරීන් දෙදෙනෙක් ලබන 21 දක්වා යළිත් රිමාන්ඩ්..
1 min read
පාස්කු ඉරුදින ත්‍රස්ත ප්‍රහාර මාලාව සම්බන්ධයෙන් පැවැත්වෙන විමර්ශනවලට අදාලව අත්අඩංගුවට ගෙන රක්ෂිත බන්ධනාගාරගත කර සිටින පොලිස් බුද්ධි නිලධාරින් දෙදෙනෙක් ලබන 21 වැනිදා දක්වා තවදුරටත් රක්ෂිත බන්ධනාගාර ගත කරන ලෙස කොටුව මහේස්ත්‍රාත් පසන් අමරසේන අද (07) නියෝග කළේය.
මෙම සිද්ධියට අදාල නඩුව අද (07) අධිකරණය හමුවේ කැඳවූ අවස්ථාවේදී මහේස්ත්‍රාත්වරයා මෙම නියෝගය නිකුත් කලේය.
මෙලෙස රක්ෂිත බන්ධනාගාර ගත කෙරුණේ වව්නතිව් යුද හමුදා කඳවුරට අනුයුක්තව සේවය කළ මෙම සිද්ධියේ පළමු සැකකරු වන යාසිම් බාවා ජෙගිල්පාස් සහ දෙවැනි සැකකරු වන සරත් සමන්ත නමැති බුද්ධි නිලධාරීන් දෙදෙනෙක්.
මෙම සැකකරුවන් දෙදනා අද (07) බන්ධනාගාරයේ රඳවා සිටිමින් සූම් තාක්ෂණය ඔස්සේ අධිකරණයට ඉදිරිපත් කර තිබුණි.
මෙම නඩුවේ තෙවැනි සැකකරු ලෙස අපරාධ පරික්ෂණ දෙපාර්තමේන්තුව විසින් නම් කර ඇත්තේ රාජ්‍ය බුද්ධි සේවයේ (SIS) හිටපු ප්‍රධානී සුරේෂ් සලේ යනඅයයි.
සිද්ධිය සම්බන්යෙන් අපරාධ පරීක්ෂණ දෙපාර්තමේන්තුව අධිකරණය හමුවේ වැඩිදුර වාර්තාවක් ඉදිරිපත් කරමින් පෙනී සිටියේය.
2019 පාස්කු ප්‍රහාරය සම්බන්ධ සිදුවීම් පිළිබඳව අපරාධ පරීක්ෂණ දෙපාර්තමේන්තුව (CID) මගින් සිදුකරන විමර්ශන හේතුවෙන් මොවුන් අත්අඩංගුවට ගෙන අධිකරණයට ඉදිරිපත් කර තිබුණි.
පාස්කු ඉරු දින ප්‍රහාරයට පෙර ඇතැම් තීරණාත්මක තොරතුරු ලැබීම සහ ඒවා ඉහළ නිලධාරීන්ට වාර්තා කිරීමේ ක්‍රියාවලිය සම්බන්ධයෙන් මෙම සැකකරුවන් ලබා දී ඇති ප්‍රකාශ සහ සාක්ෂි පිළිබඳව විශ්ලේෂණය කරමින් පවතින බවයි අපරාධ පරික්ෂණ දෙපාර්තමේන්තුව අධිකරණයට දැනුම් දුන්නේ.
ඉදිරිපත් වූ කරුණු සැලකිල්ලට ගත් අධිකරණය සැකකරුවන් දෙදෙනා ලබන 21 වැනිදා තෙක් රක්ෂිත බන්ධනාගාර ගත කර එදින තෙක් නඩුව කල් තැබීමට නියෝග කළේය.
