මහ බැංකුවේ විදෙස් සංචිතවල කැපී පෙනෙන අඩුවීමක්

මෙරට විදෙස් සංචිත පසුගිය මැයි මාසයට සාපේක්ෂව ජුනි මාසයේදී පහත වැටී ඇතැයි ශ්‍රී ලංකා මහ බැංකුව නිකුත් කර ඇති වාර්තාවක සඳහන් වේ.

මහ බැංකුව විසින් නිකුත් කර ඇති එම වාර්තාවේ දැක්වෙනුයේ පසුගිය මැයි මාසයේදී මෙරට සමස්ත සංචිත අමෙරිකානු ඩොලර් මිලියන 6,881ක් පැවැතියද එය ජුනි මාසයේදී පහත වැටී ඇති බවය.

ඒ අනුව ජුනි මාසයේදී මෙරට පැවති සංචිත ලෙස සටහන් වී ඇත්තේ අමෙරිකානු ඩොලර් මිලියන 6,450ක් වන අතර එය පසුගිය මැයි මාසයට සාපේක්ෂව අමෙරිකානු ඩොලර් මිලියන 431ක පහත වැටීමකි.

මෙම සංචිත අඩුවී සඳහා විදෙස් මුදල් සහ රන් සංචිත පහළ යාම හේතු වී ඇති බවද මහ බැංකුව අදාළ වාර්තාවේ පෙන්වා දී තිබේ.

එහිදී පසුගිය මැයි මාසයේදී විදෙස් මුදල් සංචිත අමෙරිකානු ඩොලර් මිලියන 6,661ක් වාර්තා වී තිබුණද එය ජුනි මාසය වන විට අමෙරිකානු ඩොලර් මිලියන 407ක අඩුවීමක් පෙන්නුම් කරමින් අමෙරිකානු ඩොලර් මිලියන 6,254ක් ලෙස සටහන් වී ඇත.

තවද රන් සංචිතවල සැලකිය යුතු පහළ යෑමක්ද මෙහිදී වාර්තා වී ඇති බව මහ බැංකුව නිකුත් කළ නවතම වාර්තාවේ සටහන් වී තිබේ.

ජනප්‍රිය පුවත් තිලිණි පියුමාලිට සහ ජානකී සිරිවර්ධනට කොළඹ මහාධිකරණයේදී අධිචෝදනා කියවයි | “ලෝක වෙළෙඳ මධ්‍යස්ථානයේ ඔෆිස් එකයි, සුපිරි වාහනයි දැකලා මම රැවටුණා” – අසාත් සාලි මහාධිකරණයේදී කියයි

ඒ අනුව පසුගිය මැයි මාසයේදී රන් සංචිත අමෙරිකානු ඩොලර් මිලියන 216ක් ලෙස වාර්තා වී තිබුණද පසුගිය ජුනි මාසයේදී රන් සංචිතවල පහළ යාමක් පෙන්නුම් කරමින් එය ඩොලර් මිලියන 191ක් ලෙස වාර්තා වී තිබේ.

මේ අනුව පසුගිය මැයි මාසයට සාපේක්ෂව මෙරට රන් සංචිතයේද කැපී පෙනන අඩු වීමක් වාර්තා කර ඇතැයි ශ්‍රී ලංකා මහ බැංකුව නිකුත් කළ නවතම වාර්තාවේ සඳහන් වී තිබේ.