නීතීඥ සංගම් සභාපති ගැන මන්ත්‍රී අසිත නිරෝෂන කීවේ පුද්ගලික මතයයි.. පක්ෂයේ මතය නොවේ..- මාලිමා ලේකම්
1 min read
ශ්‍රී ලංකා නීතිඥ සංගමයේ සභාපති රජීව විජේසිංහ මහතා සමගි ජන බලවේගයේ බස්නාහිර පළාත් මහා ඇමති අපේක්ෂකයා ලෙස තරග කිරීමට සූදානම් වන බවට පාර්ලිමේන්තු මන්ත්‍රී අසිත නිරෝෂණ මහතා සිදුකළ ප්‍රකාශය ඔහුගේ පෞද්ගලික අදහසක් මිස පක්ෂයේ නිල ස්ථාවරය නොවන බව ජාතික ජන බලවේගයේ මහලේකම්, පාර්ලිමේන්තු මන්ත්‍රී නිහාල් අබේසිංහ මහතා පවසයි.
අබේසිංහ මහතා සඳහන් කළේ, පාර්ලිමේන්තුවේදී මෙවැනි ප්‍රකාශ සිදුකිරීමේදී ඒවා පෞද්ගලික මට්ටමින් සිදුවන බවත්, එම ප්‍රකාශයේ වගකීම අදාළ මන්ත්‍රීවරයා සතු වන බවත්ය.
මෙම කරුණ සම්බන්ධයෙන් පක්ෂය තුළ පොදු සාකච්ඡාවක් පවත්වා තීරණයක් ගෙන නොමැති බව ද ඔහු වැඩිදුරටත් අවධාරණය කළේය.
මේ අතර, ජාතික ජන බලවේගයේ ඉදිරි දේශපාලන ගමන සැප්තැම්බර් 06 වැනිදා කළුතර දිස්ත්‍රික්කයෙන් ආරම්භ කරන බවත්, එහිදී සංවිධානාත්මක ලෙස ජනතාව සමඟ එක්වීමට බලාපොරොත්තු වන බවත් මහලේකම්වරයා පැවසීය.
විනිසුරුවරුන්ගේ විශ්‍රාම වයස දීර්ඝ කිරීම සම්බන්ධයෙන් මාධ්‍යවේදීන් නැගූ ප්‍රශ්නයකට පිළිතුරු දෙමින් ඔහු කියා සිටියේ, ඒ පිළිබඳ කැබිනට් පත්‍රිකාවක් දැනටමත් ඉදිරිපත් කර ඇති බවත්, ඉදිරියේදී ඒ සම්බන්ධයෙන් වැඩිදුරටත් සාකච්ඡා කර අවශ්‍ය පියවර ගන්නා බවත්ය.
