ඉශ්රායලයේ ගුවන් ආරක්ෂක පද්ධති මිසයිල අවසන්!
1 min read
ඉරානය සමඟ පවතින උග්ර යුද්ධය හමුවේ ඉශ්රායලයේ ‘අයන් ඩෝම්’ (Iron Dome) ඇතුළු ගුවන් ආරක්ෂක පද්ධති සඳහා භාවිතා කරන මිසයිල (Interceptors) සීඝ්රයෙන් අවසන් වෙමින් පවතින අතර, එම තත්ත්වය පාලනය කිරීම සඳහා එරට රජය සාමාන්ය කැබිනට් ක්රියා පටිපාටි පවා මග හරිමින් ඩොලර් මිලියන 710ක හදිසි ආරක්ෂක වියදම් අනුමත කර ඇති බව අල් ජසීරා (Al Jazeera) වාර්තාකරු රෝරි චැලඩ්ස් (Rory Challands) අනාවරණය කළේය. දිනපතා එල්ල වන සිය ගණනක් වූ මිසයිල සහ ඩ්රෝන ප්රහාර හමුවේ ඉශ්රායල ආරක්ෂක පද්ධති දැඩි පීඩනයකට ලක්ව ඇති අතර, මෙම වියදම් මගින් වහාම නව මිසයිල තොග මිලදී ගැනීමට අපේක්ෂිතය.
මෙම හදිසි අරමුදල් වෙන් කිරීම සම්බන්ධයෙන් ඉශ්රායල රජය තුළම යම් නොසන්සුන්කාරී තත්ත්වයක් (Strains) නිර්මාණය වී ඇති බවත්, යුද්ධයේ අධික පිරිවැය සහ සම්පත් ක්ෂය වීම පිළිබඳව දේශපාලන බලධාරීන් අතර මතභේද හටගෙන ඇති බවත් අල් ජසීරා වාර්තා පෙන්වා දෙයි. ඉරානය විසින් එල්ල කරන අඩු පිරිවැය සහිත ඩ්රෝන ප්රහාර මැඩපැවැත්වීම සඳහා ඉශ්රායලයට අතිවිශාල පිරිවැයක් දැරීමට සිදුවීම මෙම ආර්ථික සහ ආරක්ෂක පීඩනයට ප්රධාන හේතුව වී තිබේ. ඉශ්රායල මහ බැංකුව ද පවතින යුද වියදම් සම්බන්ධයෙන් අනතුරු ඇඟවීම් නිකුත් කර ඇති පසුබිමක, මෙලෙස කැබිනට් අනුමැතියකින් තොරව අරමුදල් වෙන් කිරීම විශේෂත්වයකි.
මෙම අර්බුදය හමුවේ ඇමරිකාවෙන් ලැබෙන හමුදා ආධාර මත ඉශ්රායලය දැඩි ලෙස යැපීමට පටන් ගෙන ඇති අතර, එළඹෙන දින කිහිපය තුළ ඉරානය සිය ප්රහාර තවදුරටත් දැඩි කළහොත් ඉශ්රායලයේ ගූවන් ආරක්ෂක වළල්ල බිඳ වැටීමේ අවදානමක් පවතින බව ද යුද විශ්ලේෂකයෝ අනාවැකි පළ කරති.
