ගාලු මුහුදෙන් ඔබ්බෙහි ඇති ඉරාන නෞකාවලට සැපයුම් ලබාදීම ශ්‍රී ලංකාව ප්‍රතික්ෂේප කරලා..
1 min read
ශ්‍රී ලංකා මුහුදු සීමාවෙන් පිටත නැංගුරම් ලා තිබෙන ඉරාන බොරතෙල් ප්‍රවාහන නෞකා සඳහා ආහාර සහ ජලය ඇතුළු අත්‍යවශ්‍ය ද්‍රව්‍ය සැපයීමට ඉරාන රජය විසින් කරන ලද ඉල්ලීම ශ්‍රී ලංකා රජය විසින් ප්‍රතික්ෂේප කර ඇති බව වාර්තා වේ.
‘Sunday Times’ පුවත්පත වාර්තා කරන පරිදි, මෙම නෞකාවලට යම් සැපයුම් සේවාවක් ලබා දීමට කටයුතු කළහොත් ඇමෙරිකානු ද්විතීයික සම්බාධකවලට මුහුණ දීමට සිදුවිය හැකි බවට රජය විසින් මෙරට පෞද්ගලික අංශයේ සමාගම් වෙත ද දැඩි අනතුරු ඇඟවීමක් සිදු කර ඇත.
විදේශ කටයුතු අමාත්‍ය විජිත හේරත් මහතා ප්‍රකාශ කර ඇත්තේ, මේ වන විට මෙරට මුහුදු සීමාවෙන් ඔබ්බෙහි නැංගුරම් ලා ඇති විදේශීය නෞකා 47 අතුරින් 15 ක් ඉරාන හිස් බොරතෙල් නෞකා ලෙස හඳුනාගෙන ඇති බවයි. හෝමූස් සමුද්‍ර සන්ධිය ඉලක්ක කර ගනිමින් ඇමෙරිකාව විසින් යළිත් නාවික අවහිරතා පැනවීම හේතුවෙන් ආපසු සිය රට බලා යාමට නොහැකිව මෙම ඉරාන නෞකා පසුගිය මාස කිහිපය පුරා ශ්‍රී ලංකා මුහුදු සීමාවෙන් පිටත රැඳී සිටියි. එම නෞකා පිහිටා ඇත්තේ මෙරට මුහුදු සීමාවට පරිබාහිරව බැවින්, ඒවාට කිසිදු සැපයුමක් ලබා දීමට ශ්‍රී ලංකා රජය නීතිමය වශයෙන් බැඳී නොමැති බව ද අමාත්‍යවරයා පෙන්වා දෙයි.
ඉරාන බලධාරීන් අදාළ නෞකාවලට අත්‍යවශ්‍ය ද්‍රව්‍ය ලබා දෙන ලෙස නිල වශයෙන් ඉල්ලා සිටියද, රජයක් ලෙස මෙතෙක් කිසිදු සැපයුමක් ලබා දී නොමැති අතර ඉදිරියටත් ලබා දීමේ බලාපොරොත්තුවක් නැති බව අමාත්‍යවරයා තහවුරු කළේය. කෙසේ වෙතත්, මෙම තීරණය ගනු ලැබුවේ ඇමෙරිකා එක්සත් ජනපදයේ බලපෑමක් මත නොවන බවත්, මේ සම්බන්ධයෙන් ඇමෙරිකානු රජයෙන් මෙතෙක් කිසිදු නිල පණිවිඩයක් ශ්‍රී ලංකාවට ලැබී නොමැති බවත් හෙතෙම පැහැදිලි කළේය.
සාමාන්‍යයෙන් නෞකාවලට සැපයුම් ලබාදීම පෞද්ගලික අංශය මගින් සිදුවන නමුත්, අදාළ ඉරාන බොරතෙල් නෞකා ඇමෙරිකානු සම්බාධකවලට යටත් කර ඇති බැවින් පෞද්ගලික සමාගම් ඒ සඳහා ඉදිරිපත් වුවහොත් ඇමෙරිකානු ද්විතීයික සම්බාධකවලට හසුවීමේ දැඩි අවදානමක් පවතී. එමගින් එම සමාගම්වලට ඇමෙරිකානු සමාගම් සමඟ ඇති ගනුදෙනු අහිමි වී ජාත්‍යන්තර බැංකු පද්ධතියෙන් පවා බැහැර වීමට සිදුවිය හැකි බැවින්, ඉතාමත් සුපරීක්ෂාකාරීව සහ වගකීමෙන් යුතුව කටයුතු කරන ලෙස ශ්‍රී ලංකා රජය පෞද්ගලික අංශයට දැනුම් දී තිබේ.
