එන්නත් 160,000ක් තිබියදීත් ඒවා පිළිකා රෝගීන්ට දෙන්නේ නෑ.. – රවි කුමුදේශ්ගෙන් චෝදනා..
1 min read
පිළිකා රෝගීන්ගේ කිමෝ තෙරපි (Chemotherapy) ප්රතිකාරවලදී අත්යවශ්ය වන ‘ෆිල්ගැස්ටිම්’ එන්නත් මාත්රා 160,000ක් මෙරට පවතිද්දීත්, එම එන්නත් තොගය රෝගීන්ට ලබා නොදීම දැඩි කනගාටුදායක තත්ත්වයක් බව සෞඛ්ය වෘත්තීයවේදීන්ගේ විද්වත් සංගමයේ සභාපති රවි කුමුදේශ් මහතා සඳහන් කරයි.
ආනයනය කර ඇති එන්නත්වල ලේබල් නොමැති බව පවසමින් මෙලෙස භාවිතයට නොගෙන තබා ගැනීම බරපතළ ප්රශ්නයක් බවත්, පිළිකා රෝගීන්ගේ ප්රතිකාර සඳහා දිනකට ෆිල්ගැස්ටිම් එන්නත් මාත්රා 900ක් පමණ අවශ්ය වන බවත් ඒ මහතා වැඩිදුරටත් පවසයි.
මෙම එන්නත කිමෝ තෙරපි ප්රතිකාරවලින් පසුව රෝගීන්ගේ ශරීරයේ සුදු රුධිරාණු මට්ටම පහත වැටීම නිසා ඇතිවිය හැකි ආසාදන වැළැක්වීම සඳහා අත්යවශ්ය එකකි. මෙරට පිළිකා රෝගීන්ගේ ප්රතිකාර සඳහා මාසයකට එන්නත් මාත්රා 27,500ක් අවශ්ය වන අතර, මහරගම අපේක්ෂා රෝහලට පමණක් මසකට මාත්රා 9,000ක් අවශ්ය වේ.
පවතින මෙම තත්ත්වය හමුවේ අදාළ එන්නත් තොගය ඉක්මනින් රෝගීන්ට ලබාදීමට හැකි වන පරිදි ජාතික ඖෂධ නියාමන අධිකාරිය (NMRA) වහාම සුදුසු තීරණයක් ගත යුතු බව ද ඒ මහතා පෙන්වා දෙයි.
