තනිකඩයින්ට සහකරුවන් සොයාදෙන දකුණු කොරියාවේ පන්සල
1 min read
ලොව උපත් අනුපාත වේගයෙන්ම පහත වැටෙන රටවල් අතර පෙරමුණේ පසුවන දකුණු කොරියාව, එම තත්ත්වයෙන් මිදීම සඳහා මේ වන විට වැඩපිළිවෙළ රැසක් ආරම්භ කර තිබේ.
2023 වසරේ නිල දත්ත වාර්තාවලට අනුව, දකුණු කොරියාවේ සශ්රීකත්ව අනුපාතය (කාන්තාවකගේ ජීවිත කාලය තුළ බිහිකරන සාමාන්ය දරුවන් සංඛ්යාව) 0.72ක් දක්වා අසාමාන්ය ලෙස පහත වැටී ඇත.
රටක ජනගහනය ස්ථාවරව පවත්වා ගැනීමට තිබිය යුතු අවම සශ්රීකත්ව අනුපාතය 2.1ක් වන අතර, ඒ අනුව මෙම තත්ත්වය ඊට වඩා දැවැන්ත අඩුවීමකි.
දකුණු කොරියාව තුළ මෙවැනි බරපතළ ජනගහන අර්බුදයක් නිර්මාණය වීමට ප්රධාන වශයෙන්ම බලපා ඇත්තේ තරුණ ප්රජාව විවාහ වීම සඳහා දක්වන උනන්දුව අඩුවීමයි.
ඊට හේතු රැසක් බලපා තිබේ. ඉහළ යන ජීවන සහ නිවාස වියදම්, තරුණ පිරිස්වලට තනිව නිවසක් මිලදී ගැනීමට හෝ කුලියට ගැනීමට ඇති අපහසුව, ළමා සුරැකුම් වියදම්, දරුවන් ඇති දැඩි කිරීම සඳහා අධික මූල්ය ශක්තියක් වැය කිරීමට සිදුවීම ඒ අතරින් ප්රධාන වේ.
තවද වත්මන් කොරියානු කාන්තාවන් විවාහයට වඩා තමන්ගේ රැකියාවලට සහ වෘත්තීය දියුණුවට ප්රමුඛත්වය ලබාදීම, පෙම් සබඳතා කෙරෙහි ඇති අලස බව, වර්තමාන තරුණ තරුණියන් පෙම් සබඳතා පැවැත්වීම කෙරෙහි දක්වන උනන්දුව අවම වීමද එම තත්ත්වය ඇතිවීමට බලපා ඇත.
කෙසේ වෙතත් ඇතැම් තරුණ පිරිස් ස්වකැමැත්තෙන්ම තනිකඩව සිටීමට තීරණය කර තිබුණද, තවත් බොහෝ පිරිසක් තමන්ට ගැළපෙන සහකරුවෙකු හෝ සහකාරියක සොයාගත නොහැකිව දැඩි අසීරුතාවකට පත්ව සිටින බවද අනාවරණය වී ඇත.
රජයේ සහ ආගමික අංශ මැදිහත්වී පහළ වැටෙන උපත් අනුපාත අර්බුදයෙන් රට බේරාගැනීම සඳහා මේ වන විට සුවිශේෂී පියවර රැසක් ගෙන තිබේ.
ඒ යටතේ දිගු දෙමාපිය නිවාඩු ලබාදීම, ළදරුවන් වෙනුවෙන් විශේෂ මූල්ය දීමනා පිරිනැමීම සහ අලුත විවාහ වූවන් සඳහා සහන මිලට මහල් නිවාස ලබාදීම වැනි වැඩපිළිවෙළ ක්රියාත්මකය.
රජයේ මෙම උත්සාහයට ශක්තියක් වෙමින්, දකුණු කොරියාවේ ප්රසිද්ධ බෞද්ධ පන්සලක් වන ‘ඩොන්ග්වාසා’ පන්සල ද අපූරු පියවරක් ගෙන තිබේ.
රාජ්ය අනුග්රහයද ඇතිව එම පන්සල මගින් තනිකඩ තරුණ තරුණියන් උදෙසා එකිනෙකා හඳුනා ගැනීමේ විශේෂ හමුවීම් සහ විවාහ මංගල්ය උත්සව සංවිධානය කරනු ලබයි.
එහිදී තරුණ දෙපාර්ශ්වය එකතු කර, ඔවුන් අතර අවබෝධය ගොඩනඟා විවාහය දක්වා යොමු කිරීමත්, ඉන් අනතුරුව දරුවන් ලැබීමේ වැදගත්කම පිළිබඳව ඔවුන්ව දැනුවත් කිරීමත් සිදු කෙරේ.
මෙම ඒකාබද්ධ වැඩපිළිවෙළ හේතුවෙන් කොරියානු සමාජය තුළ මේ වන විට යහපත් ප්රවණතාවක් මතුවෙමින් පවතී.
පසුගිය මාර්තු මාසයේ කරන ලද නවතම සමීක්ෂණයකින් හෙළි වී ඇත්තේ, වසර දෙකකට පෙර පැවති තත්ත්වයට සාපේක්ෂව මේ වන විට අවිවාහක පුද්ගලයන්ගේ විවාහ වීමේ සහ දරුවන් බිහිකිරීමේ කැමැත්ත 10% කට ආසන්න ප්රමාණයකින් ඉහළ ගොස් ඇති බවය.
