ක්රීඩා ඇමතිට විරුද්ධව නඩු දමයි..
1 min read
ශ්රී ලංකා ක්රිකට් ආයතනය විසින් සංවිධානය කරනු ලබන දේශීය ක්රිකට් තරගාවලියේ ව්යුහය වෙනස් කරමින් කණ්ඩායම් සංඛ්යාව අඩු කිරීමට ක්රීඩා අමාත්යවරයා ගෙන ඇති තීරණයට එරෙහිව බදුරලිය ක්රීඩා සමාජය අභියාචනාධිකරණය හමුවේ පෙත්සමක් ගොනු කර තිබේ.
ක්රීඩා අමාත්යවරයාගේ නියෝගය පරිදි පළමු පෙළ ක්රිකට් තරගාවලියට එක්වන කණ්ඩායම් 14ක සංඛ්යාව, 2026/2027 තරග වාරයේ සිට 12 දක්වා අඩු කිරීමට ශ්රී ලංකා ක්රිකට් ආයතනය පියවර ගෙන ඇත.
ඒ අනුව, ප්රසාද ලකුණු සටහනේ අවසන් ස්ථාන තුන ලබා ගන්නා කණ්ඩායම් දෙවන පෙළ දක්වා පහත හෙළීමට නියමිතය. මීට පෙර ක්රියාත්මක වූ ක්රමවේදය අනුව දෙවන පෙළට යොමු කෙරුණේ අවසන් ස්ථානය ලබා ගන්නා කණ්ඩායම පමණි.
මෙම තීරණය සම්බන්ධයෙන් අදහස් දක්වමින් බදුරලිය ක්රීඩා සමාජයේ සභාපති සුමිත් පෙරේරා මහතා සඳහන් කළේ, අමාත්යවරයාගේ මෙම ක්රියාව ක්රිකට් ආයතනයේ ව්යවස්ථාවට මෙන්ම ක්රීඩා පනතට ද පටහැනි බවයි.
මෙවැනි තීරණ හේතුවෙන් බදුරලිය වැනි ගම්බද ක්රීඩා සමාජවලට දැඩි අසාධාරණයක් සිදුවන බවත්, එමගින් දක්ෂ ක්රීඩක ක්රීඩිකාවන්ගේ අනාගතය අඳුරු වන බවත් ඔහු පෙන්වා දෙයි.
විශේෂයෙන්ම, පසුගිය සතියේ පැවති අන්තර් ක්රීඩා සමාජ ප්රමුඛතම කාණ්ඩයේ කාන්තා ක්රිකට් ශූරතාව දිනා ගැනීමට බදුරලිය ක්රීඩා සමාජය සමත් වූ පසුබිමක, මෙවැනි තීරණ හරහා ක්රීඩා සමාජ අධෛර්යමත් කිරීම අනුමත කළ නොහැකි බව ද සභාපතිවරයා වැඩිදුරටත් පැවසීය.
