හෝමූස් සමුද්‍ර සන්ධියේදී තෙල් ප්‍රවාහන නෞකා කිහිපයකට ප්‍රහාර…
1 min read
හෝමූස් සමුද්‍ර සන්ධිය හරහා යාත්‍රා කරමින් තිබූ බොරතෙල් සහ LPG ප්‍රවාහන නෞකා කිහිපයකට ප්‍රහාර එල්ල වී ඇති බව සමුද්‍රීය ආරක්ෂක වාර්තා පදනම් කරගනිමින් එක්සත් රාජධානියේ සමුද්‍රීය වෙළෙඳ මෙහෙයුම් මධ්‍යස්ථානය (UKMTO) වාර්තා කරයි.
මීට අමතරව, හෝමූස් මුහුදු කලාපයට ඇතුළු වෙමින් තිබූ තවත් තෙල් නෞකාවකට ඉරාන ඉස්ලාමීය විප්ලවීය ආරක්ෂක බලකාය (IRGC) විසින් රේඩියෝ පණිවුඩ මගින් සෘජුව අනතුරු අඟවා තිබේ.
එහිදී වහාම නෞකාව ආපසු හරවා නොගතහොත් ප්‍රහාරයකට මුහුණ දීමට සිදුවන බවට දැනුම් දී ඇති අතර, ඊට අවනත වූ එම නෞකාව ආපසු හරවා ගෙන ගොස් ඇති බව ද වාර්තා වේ.
මෙම නෞකාවන්ට එල්ල වූ ප්‍රහාර පිටුපස සිටින්නේ කවුරුන්ද යන්න මෙතෙක් නිල වශයෙන් තහවුරු කර නොමැති වුව ද, ලොව ප්‍රධානතම බලශක්ති ප්‍රවාහන නාවික මාර්ගයක් වන හෝමූස් සමුද්‍ර සන්ධිය කේන්ද්‍ර කරගනිමින් හටගෙන ඇති මෙම ගැටුම්කාරී වාතාවරණය හේතුවෙන් කලාපයේ නාවික ආරක්ෂාව පිළිබඳ දැඩි නොසන්සුන්තාවක් සහ අවදානමක් මතුව ඇත.
