ප්රතිපාදන කොමිසම ගන්න කිව්වත් 2025 සිසුන්ට සරසවිවල ඉඩ නැහැ
1 min read
2025 වසරේ උසස් පෙළ හදාරා විශ්වවිද්යාලවලට තේරී පත්වුණු සිසුන් සැප්තැම්බර් මස වන විට බඳවා ගන්නා ලෙස විශ්වවිද්යාල ප්රතිපාදන කොමිසම සහ උසස් අධ්යාපන අමාත්යාංශය විසින් උපදෙස් ලබාදුන්නද එය කළ නොහැකි බව විශ්වවිද්යාල ආචාර්යවරුන්ගේ සමිති සම්මේලනයේ සභාපති මහාචාරිය රුචික ප්රනාන්දු පවසයි.
මේ වන විටත් විශ්වවිද්යාල සියල්ල සිසුන්ගෙන් පිරී පවතින අතර අදටත් දරුවන් වසරක පමණ කාලයක් එළියේ සිටින බවත්, විශ්වවිද්යාලවල ආචාර්යවරු විශ්වවිද්යාල හැරයාම නිසා ඇති වී තිබෙන පුරප්පාඩු මෙන්ම ගැටලු රැසක් මෙම තත්ත්වයට හේතු වී ඇති බවත් ඔහු පවසයි.
මෙහිදී සභාපතිවරයා පවසා සිටියේ විශ්වවිද්යාල තුළ පවතින ඉඩකඩ සීමාවීම හේතුවෙන් 2025 උසස්පෙළට මුහුණ දුන් ශිෂ්යයන් මෙම සැප්තැම්බරයේ බඳවා ගැනීමට නොහැකි බවයි.
මේ අතර එම සම්මේලනයේ ලේකම් ජ්යෙෂ්ඨ කථිකාචාර්ය චාරුදත්ත ඉලංගසිංහ පැවසූයේ, මේ වන විට බඳවාගෙන තියෙන්නේ 2023 උසස් පෙළ කරපු කණ්ඩායම් පමණක් බවයි. 2024 සහ 2025 කණ්ඩායම් ඇතුළට පැමිණීමේ අපේක්ෂාවෙන් සිටින බවත්, 2026 උසස් පෙළ කණ්ඩායමත් ආවොත් ශිෂ්ය කණ්ඩායම් තුනක් එළියේ සිටින බවත්ය.
ඔවුහු මේ බව පැවසූයේ පසුගියදා පැවැති මාධ්ය හමුවකදී අදහස් දක්වමිනි.
මෙහිදී සභාපති මහාචාර්ය රුචික ප්රනාන්දු මෙසේද පැවසීය.
විශ්වවිද්යාල දැනටමත් පිරිලා තියෙන්නේ. සිසුන්ගේ නේවාසිකාගාර ප්රශ්න තියෙනවා. ආචාර්යවරුන්ට මේ අවස්ථාවේදී ඉගැන්වීම් කටයුතු කරන්න බොහොම අපහසුයි. ඒ නිසා බඳවා ගැනීම සහ රඳවා ගැනීම ලොකු ගැටලුවක්. ඒකට රජයට යෝජනාවලියක් ඉදිරිපත් කළා. නමුත් යෝජනාවලිය ඉදිරිපත් කරලා අවුරුදු එකහමාරක් ගතවෙලත් එය ක්රියාවට නන්වන්න සහ මේ ප්රශ්න විසඳන්න රජය මැදිහත්වෙලා නෑ.
මෙහිදී අදහස් දක්වමින් විශ්වවිද්යාල ආචාර්යවරුන්ගේ සමිති සම්මේලනයේ ලේකම් ජ්යෙෂ්ඨ කථිකාචාර්ය චාරුදත්ත ඉලංගසිංහ මෙසේ පැවසීය.
මේ ආණ්ඩුව බලයට එද්දි මල් වට්ටියේ තියලා අරන් ආවේ අධ්යාපනය. පහුගිය වසර ගණනාව තුළ විශ්වවිද්යාල ආචාර්යවරුන් බරපතළ විදිහට විශ්වවිද්යාල හැර ගියා. පහුගිය කාලෙම සාකච්ඡා කරාට ඒ සාකච්ඡා කිසිම ප්රතිඵලයක් නැති තත්ත්වයකට පත්වෙලා තියෙන්නේ. මේ වෙද්දි රජ්ය විශ්වවිද්යාල පද්ධතිය ශ්රේණිගත කිරීම්වලින් පහළට එමින් පෞද්ගලික විශ්වවිද්යාල ඉහළට එමින් තියෙනවා. මේ ආණ්ඩුවට අවශ්ය වෙලා තියෙන්නේ පෞද්ගලික අධ්යාපනය නගා සිටුවීමද කියන ප්රශ්නය අපිට තියෙනවා. සමහර පීඨවල කණ්ඩායම් හතරක් ඉන්න ඕනේ තැන්වල කණ්ඩායම් හයක් ඉන්නවා. මේ සියලුම ගැටලු හින්දා අපිට සිදුවෙනවා වෘත්තිය ක්රියාමාර්ගවලට එළඹෙන්න.
