සෙවනගල සීනි ෆැක්ටරිය විකුණන්න හදනවා.. උක් ටොන් 6,000ක් විනාශ වෙමින්.. – ගොවීන්ගෙන් චෝදනා
1 min read
සෙවණගල සීනි සමාගමේ පාලනාධිකාරිය සහ සේවකයන් අතර දීමනා හා නිවාඩු සම්බන්ධයෙන් හටගත් ගැටලුවක් මුල් කරගනිමින් ආරම්භ වූ වැඩ වර්ජනයක් හේතුවෙන් කර්මාන්තශාලාවේ කටයුතු සම්පූර්ණයෙන්ම අක්රිය වී තිබේ. මෙම වර්ජනය නිසා අස්වනු නෙළන ලද උක් ටොන් 6,000කට ආසන්න ප්රමාණයක් විනාශ වීමේ දැඩි අවදානමකට ලක්ව ඇති බව වාර්තා වේ.
අස්වනු නෙළා දින කිහිපයක් ගතවීම නිසා උක් ගස් වියළී බර අඩුවීමෙන් තමන්ගේ ආදායම සීඝ්රයෙන් පහත වැටෙන බව පවසන ප්රදේශයේ උක් ගොවීන්, පාලනාධිකාරියේ ක්රියාකලාපය හේතුවෙන් තමන් දැඩි මූල්යමය අර්බුදයකට මුහුණ දී සිටින බව පෙන්වා දෙයි. ආයතනය පවත්වාගෙන යාමට නොහැකි බව පවසමින් එය විකිණීමට උත්සාහ කරන බවටත්, පොහොර හා බීජ ලබාදීමට නිසි සහයෝගයක් නොදෙන බවටත් ගොවීන් චෝදනා කරයි.
මේ පිළිබඳව අදහස් දක්වමින් සෙවණගල සීනි සමාගමේ විධායක අධ්යක්ෂ යූ.එස්.බී. කුමාර මහතා සඳහන් කළේ, ගොවීන්ට සිදුවන පාඩුව අවම කිරීම සඳහා නෙළන ලද උක් අස්වනු පැල්වත්ත සීනි සමාගම වෙත යොමු කිරීමට පියවර ගන්නා බවයි. කෙසේ වෙතත් සේවක වැටුප් සහ දීමනා සම්බන්ධයෙන් පැවැති සාකච්ඡා එකඟතාවයකින් තොරව අවසන් වීම නිසා තවමත් උක් වගාබිම් තුළ අස්වනු වියළෙමින් පවතින බව සඳහන් වේ.
