අධිකරණ නියෝගයට කලින් චොකා මල්ලි රටින් පිටවෙලා

1 min read

ශ්‍රී ලංකා පොදුජන පෙරමුණ (SLPP) රජයේ හිටපු නියෝජ්‍ය අමාත්‍යවරයකු වන ප්‍රේමලාල් ජයසේකර මහතාට (චොකා මල්ලි) විදෙස් ගමන් තහනමක් පැනවීමට ශ්‍රේෂ්ඨාධිකරණය නියෝග කළද, එම නියෝගය නිකුත් කිරීමට පෙරම ඔහු රටින් පිටව ගොස් ඇති බව අපරාධ පරීක්ෂණ දෙපාර්තමේන්තුව (CID) අනාවරණය කරගෙන තිබේ.

ශ්‍රේෂ්ඨාධිකරණය පසුගිය සිකුරාදා ප්‍රේමලාල් ජයසේකර මහතා ඇතුළු තිදෙනකුට ඔක්තෝබර් 21 වැනිදා අධිකරණය හමුවේ පෙනී සිටින ලෙස නියෝග කරමින්, ඔවුන්ට විදෙස් ගමන් තහනමක්ද පනවා තිබුණි.

කෙසේ වෙතත්, එම ගමන් තහනම ක්‍රියාත්මක කිරීමට CID කටයුතු කිරීමේදී අනාවරණය වී ඇත්තේ ප්‍රේමලාල් ජයසේකර මහතා අගෝස්තු 31 වැනිදා තායිලන්තය බලා ශ්‍රී ලංකාවෙන් පිටත්ව ගොස් ඇති බවයි.

මේ සම්බන්ධයෙන් අනාවරණය කරගත් තොරතුරු CID විසින් නීතිපති දෙපාර්තමේන්තුව වෙත දැනුම් දී ඇති බව සඳහන් වේ.