රට හදන්න අමාරුයි | අවුරුදු 15-20ක් යනවා – නි. ඇමති චතුරංග
1 min read
පසුගිය වසර 70ක පමණ කාලයක් තිස්සේ විනාශ කළ මෙරට ආර්ථිකය වසර එකහමාරක් හෝ දෙකක් වැනි කෙටි කාලයකින් යථා තත්ත්වයට පත් කළ නොහැකි බවත්, එය සම්පූර්ණයෙන් ගොඩනැගීම සඳහා වසර 15ක් හෝ 20ක් පමණ ගත වනු ඇති බවත් නියෝජ්ය අමාත්ය චතුරංග අබේසිංහ මහතා ප්රකාශ කරයි.
පසුගිය පාලකයින් විසින් රට බංකොලොත් කර අවස්ථාවන් අහිමි කිරීම හේතුවෙන් මෙරට දරුවන්ට සහ තරුණ පරපුරට රට හැර යාමට සිදු වූ බව ඔහු පෙන්වා දෙයි.
ආණ්ඩුවේ මූලික අරමුණ වන්නේ මෙරට තුළ නැවත අවස්ථාවන් නිර්මාණය කිරීම හරහා තරුණ පරපුරට මෙරට රැඳී සිටිනවාද නැතිනම් විදේශගත වෙනවාද යන්න තීරණය කිරීමට අවශ්ය විකල්පයන් සකස් කර දීම බව හෙතෙම අවධාරණය කළේය.
සමස්තයක් ලෙස මෙරට තරුණ ප්රජාවට තවමත් නිදහසේ හුස්ම ගනිමින් මේ මහපොළොවේ ජීවත් වීමට ඇති අයිතිය තහවුරු වී නොමැති බව පෙන්වා දෙන නියෝජ්ය අමාත්යවරයා, එම අයිතිය දිනා දීම වෙනුවෙන් රජය කැපවී සිටින බව ප්රකාශ කළේය.
මෙරට වෙරළ පද්ධතිය, වනාන්තර සහ කඳු පද්ධතිය අත්විඳිමින් නිදහසේ ජීවත් වීමට තරුණ පරපුරට ඇති අයිතිය සුරක්ෂිත කිරීම මෙම සියලු සංවර්ධන ක්රියාවලීන්හි අවසන් අරමුණ බව ඔහු වැඩිදුරටත් සඳහන් කළේය
රූපවාහිනී නාලිකාවක පැවති වැඩසටහනකදී ඔහු මෙම අදහස් පළ කළේය.
