සුරේෂ් සලේගේ බිරිඳගෙන් ශානි අබේසේකරට ලිපි දෙකක්
1 min read
අපරාධ පරීක්ෂණ දෙපාර්තමේන්තුවේ රැඳවුම් භාරයේ කොළඹ ජාතික රෝහලේ ප්රතිකාර ලබමින් සිටින රාජ්ය බුද්ධි සේවයේ හිටපු අධ්යක්ෂ සුරේෂ් සලේ මහතා දිනපතා බැලීමට අවස්ථාව ලබාදෙන ලෙස ඔහුගේ බිරිඳ සහ නීතිඥවරයා අපරාධ පරීක්ෂණ දෙපාර්තමේන්තුවේ අධ්යක්ෂවරයාගෙන් ඉල්ලා තිබේ.
ඒ අපරාධ පරීක්ෂණ දෙපාර්තමේන්තුවේ අධ්යක්ෂවරයා වෙත ලිපි 02ක් යොමු කරමිනි.
පාස්කු ඉරුදින ත්රස්ත ප්රහාරය සම්බන්ධයෙන් සිදුකෙරෙන විමර්ශනවලට අදාළව රැඳවුම් නියෝග මත අපරාධ පරීක්ෂණ දෙපාර්තමේන්තුව භාරයේ සිටින රාජ්ය බුද්ධි සේවයේ හිටපු අධ්යක්ෂ විශ්රාමික මේජර් ජනරාල් සුරේෂ් සලේ මහතා තවදුරටත් රෝගී තත්ත්වයන්ට කොළඹ ජාතික රෝහලේ ප්රතිකාර ලබමින් සිටියි.
මෙවන් පසුබිමක අදාළ නඩුව ඊයේ (10) කොටුව මහෙස්ත්රාත් අධිකරණයේ කැඳවූ අවස්ථාවේ සුරේෂ් සලේ මහතා වෙනුවෙන් පෙනී සිටි නීතිඥයින් අධිකරණයෙන් ඉල්ලා සිටියේ ඒ මහතාගේ වත්මන් තත්ත්වය පිළිබඳ සලකා බලා සෑම දිනකම රෝගීන් බැලීමට ලබාදෙන කාලයේදී ඔහුගේ බිරිඳට සහ පුතාට ඔහු බැලීමට අවස්ථාව ලබාදෙමින් නියෝගයක් නිකුත් කරන ලෙසය.
කෙසේ වෙතත් එම ඉල්ලීම ඉවත දැමූ කොටුව මහෙස්ත්රාත් පසන් අමරසේන මහතා සඳහන් කළේ සැකකරු ත්රස්තවාදය වැළැක්වීමේ පනතේ විධිවිධාන ප්රකාරව රැඳවුම් භාරයේ ප්රතිකාර ලබමින් සිටින බැවින් එවැනි නියෝගයක් නිකුත් කිරීමට තමන්ට බලයක් නොමැති බවය.
මෙවැනි පසුබිමක අපරාධ පරීක්ෂණ දෙපාර්තමේන්තුව භාරයේ කොළඹ ජාතික රෝහලේ ප්රතිකාර ලබමින් සිටින සිය ස්වාමිපුරුෂයා දිනපතා බැලීමට අවසර ලබාදෙන ලෙස ඉල්ලා සුරේෂ් සලේ මහතාගේ බිරිඳ අපරාධ පරීක්ෂණ දෙපාර්තමේන්තුවේ අධ්යක්ෂ ශානි අබේසේකර මහතාට ලිපියක් යොමු කර තිබේ.
මේ අතර සුරේෂ් සලේ මහතාගේ නීතිඥ අසිත් සිරිවර්ධන මහතා ද ජාතික රෝහලේ ප්රතිකාර ලබමින් සිටින සිය සේවාදායකයාව දිනපතා බැලීමට අවසර ඉල්ලා අපරාධ පරීක්ෂණ දෙපාර්තමේන්තුවේ අධ්යක්ෂවරයා වෙත ලිපියක් යොමු කර ඇත.
ඉන් පෙන්වා දී ඇත්තේ මරාන්තික උපවාසයක යෙදී සිටින සිය සේවාදායකයාගේ තත්ත්වය නිරන්තරයෙන් නිරීක්ෂණය කරමින් ඒ පිළිබඳ අධිකරණයට කරුණු වාර්තාකර ඔහුගේ අයිතිවාසිකම් හා සුබසාධනය සැලසීමට තමන්ට වෘත්තීමය වගකීමක් ඇති බවය.
එසේම සිය සේවාදායකයා සමඟ අඛණ්ඩව අදහස් හුවමාරු කරගැනීම අවශ්ය බවද පෙන්වා දෙන නීතිඥවරයා දිනපතා සිය සේවාදායකයා හමුවීමට අවස්ථාව ලබාදෙන ලෙස සිය අපරාධ පරීක්ෂණ දෙපාර්තමේන්තුවේ අධ්යක්ෂවරයාගෙන් ඉල්ලා තිබේ.
