ඇඟලුම් අපනයන ආදායම පහළට..

පසුගිය වසරේ (2025) මුල් මාස පහට සාපේක්ෂව මේ වසරේ මුල් මාස පහ (ජනවාරි සිට මැයි) තුළදී ඇඟලුම් සහ රෙදිපිළි අපනයන ආදායම් වර්ධනය අඩුවී ඇතැයි අපනයන සංවර්ධන මණ්ඩලය පවසයි.

ඒ අනුව, ඉකුත් වසරේ (2025) ජනවාරි සිට මැයි දක්වා කාල සීමාව තුළදී ඇඟලුම් සහ රෙදිපිළි අපනයනය කිරීමෙන් එක්සත් ජනපද ඩොලර් මිලියන 2,136 ක (2,136.74) ආදායමක් උපයා ඇතත්, මේ වසරේ සමාන කාලපරිච්ඡේදය තුළදී ලබා ඇති ආදායම එක්සත් ජනපද ඩොලර් මිලියන 2,033 කි (2,033.39). ඉකුත් වසරට සාපේක්ෂව මේ වසරේ මුල් මාස පහ තුළදී ඇඟලුම් අපනයන ආදායමේ වර්ධනය සියයට ඍණ 4.84 කි.

කෙසේ නමුත්, අපනයන සංවර්ධන දෙපාර්තමේන්තුව සඳහන් කරන්නේ ඉකුත් වසරේ (2025) මැයි මාසයට සාපේක්ෂව මේ වසරේ (2026) මැයි මාසයේදී ඇඟලුම් සහ රෙදිපිළි අපනයන ආදායමේ වර්ධනය සියයට 6.66 ක් බවය.

ඇඟලුම් සහ රෙදිපිළි අපනයනය කිරීමෙන් ඉකුත් වසරේ මැයි මාසයේදී එක්සත් ජනපද ඩොලර් මිලියන 388 ක (388.81) අපනයන ආදායමක් ලැබී ඇති අතර, මේ වසරේ මැයි මාසයේ එම ආදායම එක්සත් ජනපද ඩොලර් මිලියන 414 ක් (414.72) දක්වා ඉහළ ගොස් තිබේ.

ජනප්‍රිය පුවත් එල්නිනෝවෙන් ජුනි ජූලි මාසවල වැස්සේ සැර බහී

රජයේ ප්‍රවෘත්ති දෙපාර්තමේන්තුවේ පැවැති මාධ්‍ය හමුවකදී මේ සම්බන්ධව අපනයන සංවර්ධන මණ්ඩලයේ සභාපති සහ ප්‍රධාන විධායක නිලධාරි මංගල විජේසිංහ කියා සිටියේ වසරේ මුල් මාස තුනේ අපනයන ආදායම අඩුවීමට ප්‍රවාහන වියදම් ඉහළ යාම යනාදි කරුණු නිසා අපනයනකරුවන් යම්කිසි පසුබෑමකට ලක්වූ බවත් ඇඟලුම් ක්ෂේත්‍රය හරහා මේ වසරේදී ඉලක්කයට ළඟාවීමේ හැකියාව පවතින බවයි.