බාල බෙහෙත් අපට පොවන පාලන මිල

මහ වැසි, සුළි සුළං වලින් රට දැඩි අර්බුධයකට මුහුණ දී තිබෙන මොහොතක, ඊටත් වඩා ව්‍යවසනයකට ශ්‍රී ලංකාව මුහුණ දීමට නියමිතයි.

මේ ශ්‍රී ලංකාවේ උප නූපන් දරුවන්, ගැබිණි මව්වරු, වයෝවෘද්ධ වැඩිහිටියන් පමණක් නොව සියලූම දෙනාගේ ජීවිතය අනතුරේ දමනා මහා විශාල අනතුරක්.

රජය විසින් අත්‍යවශ්‍ය ඖෂධ 350 කට පමණ පාලන මිලක් දැමීමට සුදානම් වෙනවා.

දැනට ශ්‍රී ලංකාවට ඖෂධ වර්ග 7300 ක් පමණ ආනයනය කරනවා. එමෙන්ම ඇතැම් ඖෂධ ශ්‍රී ලංකාව තුළම නිෂ්පාදනය කරනවා.

මේ ඖෂධ සියල්ලම සැපිරිය යුතු ප්‍රමිතීන් තිබෙනවා. ශ්‍රී ලංකාවේ ඖෂධ සැපයුම්කරුවෙක් වීම පහසු දෙයක් නොවෙයි. වාසනාවකට මෙරට ඖෂධ නියාමනය කෙරෙනවා.

එනම් එක්කෝ මේ ඖෂධ ඇමෙරිකා එක්සත් ජනපදයේ ආහාර සහ ඖෂධ නියාමන ආයනතනය වන FDA අනුමත ඖෂධ විය යුතුයි.

එසේත් නොමැතිනම් ඖෂධ සඳහා වන බ්‍රිතාන්‍ය ප්‍රමිතිය BP (British Pharmacopoeia) හෝ යුරෝපා ප්‍රමිතීන් අනුගමනය කළ යුතුයි.

ශ්‍රී ලංකාව සෑම සෞඛ්‍ය දර්ශකයම, අපගේ ආර්ථිකයේ ප්‍රමාණය සමග සැසඳීමේ දී ඉදිරියෙන් සිටින රටක්. ලොව දියුණු සෞඛ්‍ය පද්ධතියක් සහිත රටක්.

ළමා මරන අනුපාත, සාමාන්‍ය ආයූ කාලය ආදී දර්ශක වලින් ශ්‍රී ලංකාව ඉදිරියෙන් සිටිනවා.

එයට හේතුව ශ්‍රී ලංකා සෞඛ්‍ය පද්ධතිය කාලයක් තිස්සේ පවත්වාගෙන යන මේ ප්‍රමිතීන්.

දැනටමත් ශ්‍රී ලංකාවේ එකම ඖෂධය සන්නාම කිහිපයකින් සහ ප්‍රමිතීන් කිහිපයකින් පවතිනවා.

ඉතාම උසස් ප්‍රමිතියේ ඖෂධ මිලෙන් වැඩියි.

එමෙන්ම ඒවායේ රසායනික සංයුතිය ද ඉතාම ඉහළ ප්‍රමිතියක පවතින නිසා, සාමාන්‍යයෙන් එවැනි ඖෂධ සාපේක්ෂ අඩු ප්‍රමිතියේ ඖෂධ වලට වඩා ඉක්මන් සුවය සහ සහනය සලසනවා.

පසුගිය දිනවල රජය ඉන්දියාව සමග ඖෂධ සම්බන්ධයෙන් ගිවිසුමක් අත්සන් කළා.

එහිදී ඔවුන් ඖෂධ සම්බන්ධයෙන් වන ඉන්දියානු ප්‍රමිතිය පිළිගත්තා.

ඖෂධ සම්බන්ධ ඉන්දියානු ප්‍රමිතිය යනු දියුණු රටවල් කිසිවක් පිළිනොගන්නා, සෞඛ්‍යයට ඉතාම අහිතකර, බාල ප්‍රමිතියක්.

ඇමෙරිකාවේ, යුරෝපයේ, ජපානය වැනි දියුණු ආසියාතික රටවල් සහ මැදපෙරදිග රටවල් පවා ඉන්දියානු ප්‍රමිතියේ ඖෂධ ප්‍රතික්ෂේප කරනවා.

ඉන්දියානු ප්‍රමිතිය (IP) පිළිගෙන තිබෙන්නේ ලෝකයේ රටවල් තිහක් පමණයි.

ඒ ඉතා දිළිඳු, ඖෂධ නිෂ්පාදනයක් සිදු නොවන රටවල් පමණයි.

ඒ ඇෆ්ගනිස්ථානය, ඝානා, ගයානා, නේපාලය, නිකරගුහා, සොලමන් දූපත් ආදී තුන්වන ලෝකයේ රටවල් පමණයි.

ඉන්දියානු ඖෂධ ප්‍රමිතිය, නලින්ද ජයතිස්ස සහ අනුර කුමාර විසින් පිළිගැනීම රටට කොතරම් අහිතකරදැයි ඉහත ලයිස්තුව පරීක්ෂා කිරීමෙන් පමණක්ම වැටහෙනවා.

නමුත් ඉන්දියානු ඖෂධ ප්‍රමිතිය ශ්‍රී ලංකාවේ පිළිගැනීමෙන් පමණක්, ඉන්දියාවේ අවශ්‍යතාවය ඉටුවන්නේ නැහැ.

ශ්‍රී ලංකාවේ ජනතාව, වෛද්‍යවරු නිරතරුවම භාවිතා කරන්නේ සාපේක්ෂව ඊට උසස් ප්‍රමිතියේ ඖෂධ.

අප රටේ ජනතාව කුමක් සමග ක්‍රීඩා කළත් තමන්ගේ දරුවන්ගේ අධ්‍යාපනය සහ සෞඛ්‍ය සුලුවෙන් තකන්නේ නැහැ.

අප රටේ වෛද්‍යවරු බොහෝවිට නිර්දේශ කරන්නේ සාපේක්ෂ උසස් තත්ත්වයේ ඖෂධ. ඔවුන් රෝගී ජීවිත සමග ඔට්ටු අල්ලන්නේ නැහැ.

එවිට ඉන්දියානු ඖෂධ ජාවාරමට, ශ්‍රී ලංකා වෙළඳපොල විවෘත වන්නේ නැහැ.

එම නිසා ඉන්දියාවට අවශ්‍යයි උසස් තත්ත්වයේ ඖෂධ ශ්‍රී ලංකා භූමියෙන් අතුගෑමට.

ශ්‍රී ලාංකිකයාට මිලට ගත හැකි එකම ඖෂධ බවට බාල ඉන්දියානු ඖෂධ පත් කිරීමට.

රජය විසින් එක් වරම ඖෂධ සඳහා පාලන මිලක් ගෙන එන්නේ ඒකයි.

මේ ඖෂධ පාලන මිල පරීක්ෂා කිරීමේ දී, එම මිල පනවා තිබෙන්නේ උසස් තත්ත්වයේ ඖෂධ විකිණිය නොහැකි මිලකට.

එනම් ඇමෙරිකානු ප්‍රමිතියේ, මිප රුපියල් 50 ක් වන බෙහෙත් පෙත්තක පාලන මිල රුපියල් 20 ක්

කර තිබෙනවා

ඒ මිලට ඇමෙරිකානු ප්‍රමිතියේ ඖෂධය විකිණිය නොහැකියි. විකිණිය හැක්කේ ඉන්දියානු ප්‍රමිතියේ බාල ඖෂධය පමණයි.

එනම් ඖෂධ පාලන මිල ක්‍රියාත්මක වූ සැණින් මේ උසස් තත්ත්වයේ ඖෂධ වලට ශ්‍රී ලංකා වෙළඳපොල හැරයාමට සිදුවෙනවා.

එවිට මුදල් තිබුණත්, ඉහළ ප්‍රමිතියේ ඖෂධ භාවිතා කිරීමට අවශ්‍ය වූවත් ශ්‍රී ලාංකිකයාට ඉතිරිවන්නේ ප්‍රමිතියෙන් තොර, ඉන්දියානු ඖෂධ පමණයි.

ඒ ආකාරයට මෙරට සෞඛ්‍ය ක්ෂේත්‍රයම ඉන්දියානු ආධිපත්‍යයට යටත් කරගත හැකියි.

අප කරුණු සැඟවිය යුතු නැහැ.

ඉන්දියාව ලෝක ඖෂධ නිෂ්පාදනයේ 20% ක පංගුවක් හිමි රටක්.

ඉන්දියාවේත් විශාල ව්‍යාපාර විසින් උසස් ප්‍රමිතියේ, FDA අනුමත කර්මාන්තශාලා තුළ ඖෂධ නිපදවනවා.

විශේෂයෙන්ම අම්බානි, අදානි වැනි ව්‍යාපාර එවැනි ආයෝජන කර තිබෙනවා.

දැනට ශ්‍රී ලංකාවට ආනයනය කරන්නේ එවැනි ඖෂධ.

නමුත් ඉන්දියාවේ ඉතාම අනාරක්ෂිතව, ගෘහස්ථ සහ ප්‍රාදේශීය මට්ටමින්, කිසිඳු නියාමනයක් තොරව නිපදවන ඖෂධ කර්මාන්තයක්ද තිබෙනවා.

ඒ ඖෂධ කිසිඳු ජාත්‍යන්තර ප්‍රමිති සහතිකයකින් තොරයි.

ඉන්දියානු ෆාමකෝපියා යනු ඒ ඖෂධ.

මාලිමා රජය විසින් පිළිගත්තේ අතුරු ආබාධ බහුල, කොතරම් ලබා ගත්තත් රෝග සුව නොවන ඒ ඖෂධ.

දැනටමත් ශ්‍රී ලංකාව තුළ ඖෂධ නිෂ්පාදන කර්මාන්තයක් පවතිනවා.

සුප්‍රසිද්ධ පැනඩෝල් නිෂ්පාදනය කරන GSK ආයතනය විසින් ඖෂධ ගණනාවක් මෙරට නිපදනවා.

එය මෙරට ආර්ථිකයට විශාල සවියක් මෙන්ම දහස් ගණකට රැකියා ලබා දී තිබෙන කර්මාන්තයක්.

නමුත් මේ තීරණය ලබා ගත් සැණින් GSK ආයතනය, මෙරට ඖෂධ නිෂ්පාදනයෙන් සම්පූර්ණයෙන්ම ඉවත් වීමට සුදානම් වෙනවා.

මන්ද ඔවුන්ට ඉන්දියානු බාල ඖෂධ විකුණන මුදලට, ශ්‍රී ලංකාවේ නිපදවන ඉහළ ප්‍රමිතියේ ඖෂධ වෙළඳපලට නිකුත් කළ නොහැකියි.

මේ හේතුවෙන් ඔවුන් මෙරට නිෂ්පාදනය කළ Cozaar, Januvia, Rocephin, Augmentin Suspension ආදී ඖෂධ ගණනාවක් නිෂ්පාදනය කිරීම නවතා දමා තිබෙනවා.

එය මෙරට ආර්ථිකයට සහ දේශීය නිෂ්පාදන කර්මාන්තයට මරු පහරක් බව අමුතුවෙන් කිවයුතු නැහැ.

මේ තීරණය ක්‍රියාත්මක වූ සැණින් මෙරට සෞඛ්‍ය පද්ධතිය සම්පූර්ණයෙන්ම බිඳ වැටෙනවා.

ප්‍රමිතියෙන් ඉහළ බ්‍රිතාන්‍ය සහ ඇමෙරිකානු ප්‍රමිතියේ ඖෂධ ලබා ගත් ශ්‍රී ලාංකිකයාට, නිකරගුහාවේ දුප්පත් ජනතාව ලබා ගන්නා අතුරුආබාධ වැඩි, රෝග සුව නොවන බාල බෙහෙත් ලබා ගැනීමට වෙනවා.

ඉන්දියානු ඖෂධ ප්‍රමිතිය පිළිගන්නා ඇෆ්ගනිස්ථානය, නිකරගුවා වැනි රටවල් ලොව වැඩිම බිලිඳු මරණ අනුපාත දර්ශකයේ ඉදිරියෙන්ම සිටිනවා.

ඔබ කැමති ඇමෙරිකාවේ, බ්‍රිතාන්‍යයේ ජනතාව ලබා ගන්නා ඖෂධ ඔබගේ දරුවාට ලබා දීමටද ?

නොමැති නම් නිකරගුවාවේ, ඇෆ්ගනිස්ථානයේ අහිංසක මිනිසුන් ලබා ගන්නා බෙහෙත් ඔබේ දරුවාට ලබා දීමටද ?

පිළිතුර අප දන්නවා.

එම නිසා මේ මහා ජාතික ව්‍යවසනය කුමන සටනකින් හෝ පරාජය කළ යුතුයි.

ඔබගේ දරුවාගේ, දෙමාපියන්ගේ සහ ගැබිණි බිරිඳගේ සෞඛ්‍ය වෙනුවෙන්,

Sachin Rathwatte’s