විපක්ෂය දඩයමට යුද හමුදා බුද්ධි අංශය!

රහස් පොලීසියට ලැබුණු පැමිණිල්ලක් මත අම්බලන්ගොඩ නගරයට සමීපව, එම නගරය හා ගාල්ල නගරය අතර පිහිටි නිවසක් පරීක්ෂා කිරීමට පසුගිය දා පියවර ගෙන තිබුණි. ප්‍රදේශවාසීන් විසින් CIDයට පැමිණිලි කර තිබුණේ අදාළ නිවසේ අවි ආයුධ තිබෙන බවට සැක කරන බවයි. ඒ අනුව පරීක්ෂා කිරීමේදී නිවස තුළ තිබී අවි ආයුධ සොයා ගැනීමට රහස් පොලීසිය සමත් වී තිබේ. එහෙත් ඒ සමගම රහස් පොලීස් නිලධාරීන් වෙත ඉහළින් ආ ඇමතුමකින් පවසා ඇත්තේ අදාළ නිවස යුද හමුදා බුද්ධි අංශය විසින් පවත්වාගෙන යන ආරක්ෂිත නිවස්නයක් (Safe House) බවයි. ඒ අනුව, රහස් පොලිස් නිලධාරීන් පරීක්ෂා කටයුතු නතර කර එම ස්ථානයෙන් නික්ම ගොස් තිබේ.

පසුව කරන ලද වැඩිදුර තොරතුරු විමර්ශනයේදී අනාවරණය වී ඇත්තේ අදාළ නිවස යුද හමුදා බුද්ධි අංශයේ මේජර් අසංක කෝට්ටේගොඩ නැමැති නිලධාරියකු බාරයේ පවත්වාගෙන යනු ලබන ආරක්ෂිත නිවස්නයක් බවයි. දකුණු පළාත තුළ මේ අන්දමේ ආරක්ෂිත නිවස්නයක් පවත්වාගෙන යාම පිළිබ‍ඳව සිදුකරන ලද වැඩිදුර ගවේශණයේදී වාර්තා වී තිබෙනුයේ ඉතා භයානක තොරතුරු රැසකි.

ජ.වි.පෙ. බලයට පත්වීමෙන් පසුව යුද හමුදා බුද්ධි අංශයේ සිටි ප්‍රවීන නිලධාරීන් වෙනත් රාජකාරී සඳහා යොදවා, ජාතික බුද්ධි ප්‍රධානියා බවට පත් කළේ නලින්ද නියන්ගොඩ ය. ඔහු සහ ඔහුගේ බිරිඳ පසුගිය ජනාධිපතිවරණය හා මහමැතිවරණය තුළ දී විවෘතවම ජාතික ජනබලවේගයේ ජයග්‍රහණය වෙනුවෙන් ක්‍රියා කර තිබේ. හිමාලි ඒකනායක නැමති ඔහුගේ බිරිඳගේ සමාජ මාධ්‍ය පිටුවේ සිය ස්වාමියා විසින් ජාතික ජන බලවේගයට ඡන්දය ලබා දෙන ලෙස ඉල්ලමින් සිදුකර ඇති ප්‍රකාශයක්ද වීඩියෝ පටිගත කර ප්‍රසිද්ධ කර තිබේ.

ජාතික බුද්ධි ප්‍රධානී නලින්ද නියන්ගොඩ විසින් ජාතික ජන බලවේගයට ඡන්දය ලබාදෙන ලෙස ඉල්ලමින් සමාජ මාධ්‍යට මුදාහල වීඩියෝ පටය

දේශපාලන වශයෙන් තම ගැත්තෙකු යුද හමුදා බුද්ධි අංශයේ ප්‍රධානියා බවට පත්කර ගැනීමෙන් පසු, ජනාධිපති අනුර කුමාර එම අංශය යොමු කර ඇත්තේ විපක්ෂයේ දේශපාලනඥයන් පිළිබඳ තොරතුරු සෙවීමට ය. එසේම අවශ්‍ය අවස්ථාවක දී හානි සිදුකිරීමට ද යොදා ගැනීමට ය. ඒ අනුව අහම්බයකින් අනාවරණය වූ ඉහත දක්වන ලද ආරක්ෂිත නිවස්නය වැනි ආරක්ෂිත නිවාස 16ක්, විපක්ෂ දේශපාලනඥයන්ගේ ක්‍රියාකාරීත්වය නීරීක්ෂණය කිරීම සඳහා අළුතෙන් පිහිටුවා තිබේ.

නලින්ද නියන්ගොඩගේ බිරිඳ සක්‍රීයව ජාතික ජනබලවේගයේ ජයග්‍රහණය වෙනුවෙන් කටයුතු කර ඇති අයුරු

නලින්ද නියන්ගොඩගේ බිරිඳගේ Facebook පිටුවට මෙතැනින්

මීට අමතරව, යුද හමුදා බුද්ධි අංශයට වෙන් වන, විගණනයට භාජනය නොවන රුපියල් මිලියන 500කට වැඩි රහස්‍ය ගිණුම් මුදල් ජ.වි.පෙ. විසින් රට පුරා පිහිටුවා ඇති ප්‍රජා ශක්ති කමිටුවේ ප්‍රධානියාට (ජ.වි.පෙ. සාමාජිකයාට) මාසිකව මුදල් ගෙවීම සඳහා ද යොදා ගනු ලබමින් ඇත. මත්ද්‍රව්‍ය නිවාරණය ගැන තොරතුරු සොයන බව මතුපිටින් පෙන්වමින් ඔවුන් සැබෑ ලෙසම සිදු කරනුයේ විපක්ෂ දේශපාලනයේ නියුතු පුද්ගලයන් පිළිබඳ තොරතුරු සෙවීම හා එම තොරතුරු යුද හමුදා බුද්ධි අංශ නිලධාරින්ට වාර්තා කිරීම ය.පමණක් නොව, අවශ්‍ය වුවහොත් විපක්ෂ දේශපාලඥයන් මර්ධනය කිරීමට ද යොදවා ගනු ලබන මෙහෙයුමක් බව යුද හමුදා බුද්ධි අංශ ආරංචි මාර්ග පෙන්වා දේ. මේ පිළිබඳව විපක්ෂයේ දේශපාලනඥයන් කිසිවකු සැළකිල්ලක් නොදක්වා සිටීම ද ආණ්ඩුවට මෙම රහසිගත මෙහෙයුම ඉදිරියට ගෙන යාමට උපකාරී වී තිබේ.

බුද්ධි අංශය සතු රජයේ මුදල් සහිත රහස්‍ය ගිණුම යොදා ගනිමින් පාක්ෂිකයන්ට වැටුප් ගෙවීමත්, එමගින් ඔවුන් විපක්ෂ දඩයමට යොදවා ගැනීමත් ඉතා බරපතළ අවදානම් සහගත තත්වයක් බව පැහැදිළි ය.

lankaunderground විශේෂ විමර්ශන අංශය